Ezeciel 25 - William Morgan Bible 1588 original edition

PEN. XXV.Prophwydoliaeth yn erbyn yr Ammoniaid, 8 Y Moabiaid, 12 Yr Edomiaid, 15 A’r Philistiaid.

1A Gair yr Arglwydd a ddaeth attaf gan ddywedyd:

2Ha fab dŷn gosot dy wyneb at feibion Ammon: a phrophwyda yn eu herbyn hwynt,

3A dywet wrth feibion Ammon, gwrandewch air yr Arglwydd Dduw, fel hyn y dywed yr Arglwydd Dduw: am ddywedyd o honot, haha, am fyng-hyssegr pan halogwyd, ac am dîr Israel pan ddinistriwyd, ac am dŷ Iuda, pan aethant mewn caeth-glut:

4Am hynny wele fi yn dy roddi di yn etifeddiaeth i feibion y dwyrain, fel y gosodant eu tyrau ynot, ac y rhoddant eu pebyll o’th fewn, hwynt a yssant dy ffrwyth, a hwynt a yfant dy laeth.

5Rhoddaf hefyd 2.Sam.12.27.Rabbah ym drigfa camelod: a meibion Ammon yn orweddfa defaid: fel y gŵypoch mai myfi yr Arglwydd.

6Canys fel hyn y dywed yr Arglwydd Dduw, o herwydd curo o honot law, ac estyn o honot draed, a llawenychu o honot trwy holl diystyrwch dy galon yn erbyn tîr Israel.

7Am hynny wele mi a estynnaf fy llaw i’th erbyn fel i’th roddwyf yn fwyd i’r cenhedloedd, ac i’th dorrwyf o’r bobloedd, ac i’th ddifethwyf o’r tiroedd: dinistriaf di fel y gŵypech mai myfi yr Arglwydd.

8Fel hynn y dywed yr Arglwydd Dduw, am ddywedyd o Moab a Seir, wele dŷ Iuda fel yr holl genhedloedd:

9Am hynny wele fi yn agori ystlys Moab o’r dinasoedd, oi ddinasoedd ef, yn ei gwrr: gogoniant y tîr, Bethiesimoth, Baalmeon a Chiriathaim,

10I feibion y dwyrain, yng-hyd â meibion Ammon, canys rhoddaf hithe yn etifeddiaeth: fel na choffeir meibion Ammon ym mysc y cenhedloedd.

11Gwnaf farn hefyd ar Moab, fel y gwypont mai myfi yr Arglwydd.

12Fel hyn y dywed yr Arglwydd Dduw, am i Edom wneuthur yn erbyn tŷ Iuda, pan wnaeth ddial: (canys gwnaethant gamwedd mawr pan ddialasant arnynt)

13Am hynny medd yr Arglwydd Dduw, yr estynnaf inne fy llaw ar Edom, a thorraf o honi ddŷn, ac anifail: syrthiant ar gleddyf, fel y rhoddwyf hi yn anrhaith o Theman, hyd Dedanah.

14A rhoddaf fy nial ar yr Edomiaid trwy law fy mhobl Israel, a hwynt a wnant ag Edom yn ôl fy nigllonedd a’m llîd: fel yr adwaenant fy nail medd yr Arglwydd Dduw.

15Fel hyn y dywed yr Arglwydd Dduw, am wneuthur o’r Philistiaid trwy ddial, a dialu dial drwy ddiystyrwch calon, gan ddinistrio drwy elynniaeth tragywyddol:

16Am hynny, fel hynn y dywed yr Arglwydd Dduw, wele fi yn estynn fy llaw ar y Philistiaid, fel y torrwyf ymmaith y Cerethiaid, ac y difethwyf weddill porthladd y môr.

17Yna y gwnaf arnynt ddial mawr, trwy gerydd llidioc, fel y gwypont mai myfi ydwyf yr Arglwydd, pan roddwyf fy nial arnynt.