Iob 22 - William Morgan Bible 1588 original edition

PEN. XXII.Eliphaz yn teuru mai am ei annuwioldeb y cospasid Iob, 6 Gan roddi yn ei erbyn ef fod yn anrhugarog i bob math ar ddyn, ai fod efe yn ammau rhagluniaeth Duw, ai lywodraeth. 21 Yna y mae Eliphaz yn cynghori Iob i edifarhau.

1Yna Eliphaz y Themaniad a attebodd, ac a ddywedodd:

2A wna gŵr lessâd i Dduw? iddo ei hun yn hytrach y gwna y synhwyrol lessâd.

3Ai digrifwch i’r Holl-alluog pan ymgyfiawnhech? neu ai êlw pan berffeithiech di dy ffyrdd?

4Ai rhac dy ofn y cerydda efe dydi: yr aiff efe gyd â thi i farn?

5Onid ydyw dy ddrygioni di yn aml? ac heb ddiwedd ar dy anwireddau?

6Canys cymmerit ŵystl gan dy frodyr yn ddiachos: a dioscit ddillad y rhai noethion.

7Ni roddit ddwfr iw yfed i’r lluddedic: a thi a attelit fara oddi wrth y newynoc.

8Y ddaiar hefyd oedd eiddo y gŵr cadarn: yr anrhydeddus a drige ynddi.

9Danfonit ymmaith wragedd gweddwon yn wag-law: a breichiau y rhai ymddifaid a ddryllit ti.

10Am hynny maglau o’th amgylch: ac y mae ofn yn dy ddychrynu di yn ddisymmwth:

11Neu dywyllwch rhac gweled o honot: a llawer o ddyfroedd a’th orchguddiant.

12Onid Duw yn vchelder y nefoedd? gwel hefyd benn y sêr mor vchel ydynt hwy.

13A ddywedi di gan hynny, pa fodd y gŵyr Duw? a farn efe drwy dywyllwch?

14Y cwmylau loches iddo ef, ac ni wel: ac y mae efe yn rhodio gylch y nefoedd.

15A ystyriaist i lwybr y byd, yr hwn a sathrodd ofer-wŷr

16Y rhai a dorrwyd pan nid eu hamser hwynt: afon a dywalltwyd ar eu sylfaen hwy.

17Hwynt a ddywedasant wrth Dduw, cilia oddi wrthym: a pha beth a wnaeth yr Holl alluog iddynt hwy?

18Ac efe a lanwase eu tai hwy o ddaioni: am hynny pell cyngor yr annuwolion oddi wrthifi.

19Y rhai cyfiawn a welant, ac a lawenychant: a’r diniwed ai gwatwar hwynt.

20Gan na thorred ymmaith ein sylwedd ni: ac yssu o’r tân eu gweddill hwy.

21Ymarfer attolwg ag ef, a bydd heddychlon: o hyn y daw i ti ddaioni.

22Cymmer y gyfraith attolwg oi enau ef: a gosot ei eiriau ef yn dy galon.

23Os dychweli at yr Holl-alluog ti a adailedir: os symmudi anwiredd ym mhell oddi wrth dy luestai.

24Gosodi mor aml a’r pridd: ac Ophir fel callestr yr afonydd.

25A’r Holl-alluog fydd yn amddeffyn i ti: a thi a gei amldra o arian.

26Os yna’r ymhoffi yn yr Holl-alluog: dithe a dderchefi dy wyneb at Dduw.

27Ti a weddii arno ef, ac efe a’th wrendu di: tithe a dêli dy addunedau.

28Pan ragluniech di beth, efe a sicrhâ i ti: a goleuni a lewyrcha ar dy ffyrdd.

29Pan ostynger hwynt yna y dywedi, oruchafiaeth: canys efe a achub y gostyngedic olwg.

30Y diniwed a wareda yr ynys: a thrwy lendid dy ddwylaw di y gwaredir hi.