2 MAKKABIN 9 - Maltese Bible with DC

Kapitlu 9Il-mewt ta’ Antijoku (163 QK)

1Għall-ħabta ta’ dak iż-żmien ġara li Antijoku kien raġa’ lura mħawwad mill-inħawi tal-Persja.

2Kien daħal fil-belt jisimha Persepoli u medd idu biex jisraq it-tempju u jaħtaf il-belt f’idejh; imma l-kotra qamet u qabdet l-armi biex tiddefendihom, u dak kellu jaħrab. U hekk ġara li Antijoku, imġiegħel jaħrab min-nies tal-belt, kellu jerġa’ lura mimli bl-għajb.

3Meta kien f’Ekbatana sar jaf b’dak li ġara lil Nikanor, u lin-nies ta’ madwar Timotju.

4Mitluf minn sensih bl-għadab, waħħalha f’rasu li jitħallas mil-Lhud tal-għajb li ġiebu fuqu dawk li ġegħluh jaħrab, u għalhekk ordna lis-sewwieq li jġerri kemm jiflaħ bla ma jieqaf sa ma jtemm il-vjaġġ. Imma l-ġudizzju tas-sema kien diġà laħqu. Minfuħ bih innifsu qal: “Malli nasal Ġerusalemm nagħmel minnha ċimiterju tal-Lhud.”

5Imma l-Mulej, Alla ta’ Iżrael, li jara kollox, laqtu b’marda bla fejqan li ma tidhirx. Malli temm dan il-kliem qabdu wġigħ ma jittaffiex kbir f’imsarnu u turmenti ħorox minn ġewwa.Atti 12,20-23.

6U hekk kien ħaqqu, għax hu kien ġiegħel l-imsaren ta’ oħrajn isofru torturi bla għadd, li qatt ħadd ma kien sama’ bihom.

7Iżda hu ma naqqas xejn mis-suppervja tiegħu, imma kollu mkabbar bih innifsu, mixgħul b’nar ta’ qilla kontra l-Lhud, ġagħalhom isuqu aktar. Ġara mbagħad li hu tgerbeb minn fuq il-karru kif kien imlibbet, u ħa tisbita hekk qawwija li kisser ġismu kollu.

8U dak li ftit qabel bis-suppervja bla qjies ’il fuq minn ta’ kull bniedem kien jaħseb li jista’ jikkmanda l-ħalel tal-baħar u jiżen fl-istasija l-qċaċet tal-muntanji, sab ruħu mitfugħ fl-art u kellhom iġorruh fuq lettiga. U hekk wera biċ-ċar lil kulħadd il-qawwa ta’ Alla.Ġob 38,8-11; S 65,6-8; Is 40,12; 51,15; 2 Mak 5,21.

9U d-dud beda ħiereġ mill-ġisem ta’ dan il-midgħi u, kif kien għadu ħaj, laħmu beda jaqa’ biċċa biċċa, fost uġigħ u tbatijiet mill-eħrex; u r-riħa u l-intiena tal-ġrieħi tiegħu, l-eżerċtu ma felaħx għalihom.

10U dak li ftit qabel kien ħaseb li laħaq b’idejh il-kwiekeb tas-sema, ħadd issa ma’ kellu l-ħila jġorru minħabba l-intiena li ebda bniedem ma kien jista’ għaliha.

11Kif kien daqshekk imfarrak, beda jfarfar minn fuqu s-suppervja kbira tiegħu u jasal biex jagħraf lilu nnifsu taħt is-sawt ta’ Alla u bl-uġigħ jiżdied minn waqt għal ieħor.

12U fl-aħħar, meta lanqas hu stess ma sata’ jżomm bl-intiena tiegħu nnifsu, stqarr u qal dan: “Sewwa li wieħed joqgħod għar-rieda ta’ Alla u li bniedem suġġett għall-mewt ma jqisx ruħu daqs Alla.”

13Imbagħad dan il-bniedem mill-agħar beda jitlob lis-Sid, li għalih ma kellux ħniena, u jwiegħed

14li l-belt imqaddsa, fejn kien sejjer mgħaġġel biex iwittiha u jbiddilha f’ċimiterju għal niesha, jagħmel minnha belt ħielsa;

15li l-Lhud kollha jagħmilhom daqs in-nies ta’ Ateni - il-Lhud, li sa ftit qabel kien jaħseb li lanqas difna ma tixirqilhom, imma li jwaddabhom bit-trabi b’kollox b’għalf għall-bhejjem tax-xagħri u għat-tjur tal-ajru;

16li jżejjen b’offerti mill-isbaħ it-tempju li qabel kien serqu; u li jroddilhom it-tagħmir imqaddes kollu u jagħtihom ħafna aktar milli kellhom; li jħallas mid-dħul tiegħu n-nefqa għas-sagrifiċċju,

17u fl-aħħar li hu stess isir Lhudi u jdur mad-dinja kollha fejn jgħammru n-nies u jxandar il-qawwa ta’ Alla ma’ kullimkien.

18Imma l-uġigħ ma naqasx; kienet diġà laħqitu s-sentenza ġusta ta’ Alla, u b’jiesu maqtugħ kiteb lil-Lhud din l-ittra li ġejja; kienet qisha talba u kienet tgħid hekk:

19“Is-sultan u ġeneral Antijoku lil-Lhud, ċittadini tiegħu mill-aħjar, sliem, saħħa u riżq bil-kotra.

20Niżżi ħajr lil Alla, mill-aktar, u nqiegħed fis-sema t-tama tiegħi talli intom u wliedkom tinsabu tajbin, u kollox sejjer skont qalbkom.

21Mixħut marid kif jien, niftakar minn qalbi fil-ġieħ u t-tjieba li wrejtu miegħi. Jien u rieġa’ lura mill-inħawi tal-Persja ġiet fuqi marda qalila u deherli li jenħtieġ naħseb għall-ġid ta’ kulħadd.

22Jien ma qtajtx qalbi minni nnifsi; għad għandi tama sħiħa li neħles minn din il-marda.

23Imma rajt li missieri wkoll, kull meta kien joħroġ għall-gwerra fl-inħawi tat-Tramuntana, kien jaħtar lil min kellu jilħaq floku,

24biex, jekk tinqala’ xi ħaġa minn taħt ir-riħ jew tixtered xi aħbar ħażina, in-nies tas-sultan ikunu jafu f’idejn min tħalliet l-amministrazzjoni u hekk ma jitħawdux.

25Barra dan qist ukoll li s-slaten ġirien tagħna u l-prinċpijiet qrib tas-saltna tagħna dejjem jistennew il-waqt u jgħassu x’se jiġri, għalhekk ħtart sultan għal warajja lil ibni Antijoku, li bosta drabi meta kont noħroġ għall-gwerra fl-inħawi ta’ fuq, irħejt f’idejkom u tlabtkom teħduli ħsiebu. Jien ktibtlu dawn id-deċiżjonijiet.

26“Jien inħeġġiġkom u nitlobkom li tiftakru fil-ġid li għamilt lilkom, ilkoll kemm intom, u lil kull wieħed minnkom sabiex ilkoll, wieħed wieħed, turu dejjem dik it-tjieba li diġà wrejtu miegħi u ma’ ibni.

27U jiena żgur li fuq il-parir tiegħi jimxi bil-qjies u t-tjieba u jkun jinġieb magħkom.”

28U hekk temm ħajtu dan il-bniedem qattiel u midgħi, hemm fuq il-muntanja f’art barranija, b’mewt mill-agħar, fost l-eħrex turmenti, bħalma hu kien ġiegħel lil ħaddieħor ibati.

29U Filippu li kien trabba miegħu, ġarr il-katavru, u billi baża’ minn ibnu Antijoku, mar jistkenn fl-Eġittu għand Tolemew Filometor.