BIN SIRAK 49 - Maltese Bible with DC

Kapitlu 49Ġosija

1It-tifkira ta’ Ġosija hi bħal taħlita inċens,

imħejjija bis-sengħa ta’ fewwieħ.

Fuq fomm kulħadd hi ħelwa għasel,

u hi bħal mużika waqt festa bl-inbid.

2Hu mexa dritt u kkonverta l-poplu,

u neħħa l-għajb tal-idoli pprojbiti mil-Liġi.

3Ħsiebu kien fil-Mulej,

u fi żmien nies li ma ridux jafu b’Liġi saħħaħ il-qima ta’ Alla.

L-aħħar slaten u l-profeti

4Barra minn David, Ħeżekija, u Ġosija,

kollha żbaljaw bl-ikrah;

għax telqu l-Liġi tal-Għoli,

is-slaten ta’ Ġuda għebu,

5għax qawwiethom tawha lil ħaddieħor,

u sebħhom lil ġens barrani.

6Taw in-nar lill-belt magħżula tat-tempju,

u triqatha għamluhom ħerba,

7kif kien qal Ġeremija.

Għax ġiebu ruħhom ħażin miegħu,

għad li kien ikkonsagrat profeta

sa minn ġuf ommu,

biex jaqla’, jeqred u jħott,

jibni u jħawwel.

8Kien Eżekjel li ra d-dehra tal-glorja,

li Alla wrieh fuq il-karrijiet tal-kerubini.

9Għax ftakar fl-għedewwa tiegħu b’xita qalila,

u għamel il-ġid ma’ dawk li triqathom kienu dritti.

10U l-għadam tat-tnax-il profeta

jalla jieħu r-ruħ minn fejn qiegħed;

għax sabbru lil ulied Ġakobb,

u fdewhom b’fidi u tama.Żerubbabel u Ġożwè

11Kif nistgħu nuru l-kobor ta’ Żerubbabel?

Kien bħal siġill f’id il-leminija,

12hekk ukoll Ġożwè bin Ġeħosadak;

fi żmienhom bnew it-tempju,

u tellgħu d-dar qaddisa tal-Mulej,

iddestinata għall-glorja ta’ dejjem.

Neħemija

13It-tifkira ta’ Neħemija tibqa’ wkoll għal dejjem,

hu talla’ għalina d-djar imġarrfa tagħna,

u qiegħed il-bibien u l-istaneg,

u raġa’ bena djarna.Ħarsa lura

14Ħadd ma kien maħluq fuq l-art bħal Ħenok;

hu ttieħed minn fuq l-art.

15Qatt ma twieled bniedem bħal Ġużeppi,

kien mexxej ta’ ħutu, fuqu l-poplu kien iserraħ.

Dawn ħadu ħsieb sal-fdal t’għadmu.

16Sem u Set kienu mweġġħin mill-bnedmin,

u fuq kull ħaj fil-ħolqien hemm Adam.