ĠOB 39 - Maltese Bible with DC

Kapitlu 39

1“Taf int meta jferrgħu l-mogħoż tal-muntanji?

Qatt rajt iċ-ċriev waqt il-ħlas tagħhom?

2Tgħodd int ix-xhur tat-tqala tagħhom,

u tkun taf xħin għandhom jeħilsu?

3Huma jinżlu kokka u jferrgħu l-boton,

u jerħu fix-xagħri l-frieħ tagħhom.

4Meta jissaħħu l-frieħ u jikbru,

jitilqu u ma jiġux lura lejhom.

5Min telaq ħieles lill-ħmar selvaġġ?

Min qatagħlu l-irbit tiegħu?

6Kont jien li tajtu d-deżert b’daru,

u l-art selvaġġa b’għamara tiegħu.

7Hu jistmerr il-ħsejjes tal-belt,

u ma jridx jisma’ ordnijiet tas-sewwieq.

8Idur fuq l-għoljiet għall-mergħa tiegħu,

ifittex kull roqgħa ta’ ħdura.

9Irid jewwilla l-gendus selvaġġ jaħdimlek,

jew jgħaddi l-lejl ħdejn il-maxtura tiegħek?

10Torbotlu inti ħabel m’għonqu,

u żżommu jxattab ir-raddi warajk?

11Tafdah int għax b’saħħtu ħafna,

u terħi lilu x-xogħol iebes tiegħek?

12Temmen int li jiġik lura

biex jidres il-qamħ fuq il-qiegħa tiegħek?

13Ġewnaħ in-nagħma jħabbat bil-qawwa,

iżda n-nagħma bħall-għarnuq ma ttirx.

14Meta titlaq fuq l-art il-bajd tagħha,

u tħallihom jisħnu fit-trab,

15ma jiġix f’moħħha li xi riġel jista’ jgħaffiġhom,

jew tirfishom xi bhima selvaġġa.

16Twebbes qalbha għal frieħha, qishom mhumiex tagħha,

ma tinkeddx jekk jisfa fix-xejn ix-xogħol tagħha.

17Dan għax Alla ċaħħadha mill-għerf,

u ma taha l-ebda sehem fid-dehen.

18Iżda xħin tagħti s-salt u tirranka,

tisfida liż-żiemel u r-rikkieb.

19Tagħti int liż-żiemel is-saħħa,

jew tlibbislu għonqu bix-xuxa?

20Iġġagħlu inti jaqbeż bħall-ġrad,

hu li jbeżżgħek xħin jiżher u jonfor?

21Kollu ferħan iħabbat bil-qawwa nagħlu,

u joħroġ b’saħħa għal quddiem l-armi.

22Jisfida l-periklu, ma jitwerwirx,

lanqas jinqata’ quddiem is-sejf.

23Fuq dahru ċċekċek il-barżakka,

tleqq il-lanza u x-xabla magħha.

24Bil-ħeġġa u l-leblieba t-triq jiblagħha,

ma jibqax sabar fih kif jisma’ t-tromba.

25Għal kull żarżira jiżher waħda,

ixomm mill-bogħod it-taqbida,

it-tħambiq tal-fizzjali u l-għajjat ta’ gwerra.

26Jaqaw għallimtu int jittajjar is-seqer,

u jifrex ġwenħajh lejn in-Nofsinhar?

27U l-ajkla b’ordni tiegħek li titla’ fl-għoli,

u tagħmel hemm fuq nett il-bejta tagħha?

28Fuq l-irdum hi toqgħod u tgħaddi l-lejl,

fuq il-qċaċet il-fortizza tagħha.

29Minn hemm fuq tgħarrex għall-priża,

jarawha mill-bogħod għajnejha.

30Il-frieħ tagħha jsoffu d-demm,

fejn ikunu l-maqtulin hemm tkun hi.”