BIN SIRAK 42 - Maltese Bible with DC

1M’għandekx tistħi minn dan li ġej,

u tħarisx lejn l-uċuħ għax tidneb:

2tistħix mil-Liġi u l-patt tal-Għoli,

tistħix mill-kundanna b’ġustizzja mal-ħażin;

3tistħix tagħmel il-kontijiet ma’ sieħbek jew ma’ min jimxi miegħek fit-triq,

u tqassam il-wirt lill-oħrajn;

4li tkun tal-qjies fl-użin u l-piż,

u li tagħmel ħafna jew ftit qligħ,

5u li taqla’ min-negozju ma’ bejjiegħ;

li tkun iebes fit-trobbija ta’ wliedek;

u li ssawwat bl-aħrax ġenb il-qaddej ħażin;

6li taqfel ġewwa l-mara ħażina,

u ssakkar fejn hemm ħafna idejn.

7Dak li terfa’, ara li jkun bl-għadd u l-piż;

u f’dak li toħroġ u ddaħħal, ħalli kollox bil-kitba.

8Tistħix twissi lil min hu iblah u bla moħħ,

jew lil xiħ għakka li jitlewwem ma’ żagħżugħ.

Hekk turi li int imrobbi sewwa,

u tintlaqa’ tajjeb minn kulħadd.Il-ħsieb tal-missier dwar bintu

9Bint iżżomm lil missierha mqajjem bla ma tintebaħ,

u l-inkwiet tagħha jtajjarlu n-ngħas;

f’żgħożitha, li ma tmurx ma tiżżewiġx,

u fiż-żwieġ tagħha, li ma tmurx tinbagħad,

10fi xbubitha, li ma tmurx tittiefes,

u toħroġ tqila f’dar missierha;

meta għandha r-raġel, li ma tmurx tibdlu,

u meta hi miżżewġa, li tibqa’ bla tfal.

11Agħmel għassa sewwa fuq tifla rasha iebsa,

li ma tmurx iddaħħak l-għedewwa tiegħek bik,

iġġibek f’ilsien il-belt kollha

jew tagħmlek l-għajdut tan-nies,

u ġġagħlek tistħi quddiem kotra kbira.

12Tħallihiex tikxef ġmielha lil ebda raġel,

u lanqas tpaċpaċ qalb in-nisa.

13Għax mill-ħwejjeġ toħroġ il-kamla,

u minn mara l-ħażen ta’ mara.

14Aħjar ħżunit raġel minn mara li tagħmel it-tajjeb;

hi l-mara li ġġib fuqek mistħija u għajb.Sebħ Alla fin-natura

15Sa nfakkar issa l-għemejjel tal-Mulej,

u nitkellem fuq dak li rajt.

Bi kliem il-Mulej saru l-għemejjel tiegħu.

16Ix-xemx iddawwal hi u tħares fuq kollox;

hekk b’sebħ il-Mulej hu mimli xogħlu.

17Lanqas lill-qaddisin tiegħu ma ta l-Mulej is-setgħa,

li jgħoddu u jfissru għeġubijietu,

dak li għamel il-Mulej li jista’ kollox

biex il-ħolqien kollu jkun fis-sod fil-glorja tiegħu.

18Jifli l-abbissi u qlub il-bnedmin,

u jagħraf it-triqat imwiegħra tagħhom,

għax Alla l-għoli jagħraf kulma jista’ jingħaraf,

u jħares lejn is-sinjali taż-żmien.

19Iħabbar dak li għadda u dak li għad ikun,

u jikxef triqat il-ħwejjeġ mistura.

20Ma jaħrablu l-ebda ħsieb,

u lanqas kelma waħda mhi moħbija minnu.

21Qassam bl-ordni l-opri l-kbar ta’ għerfu,

u hu minn dejjem u għal dejjem.

Xejn ma jiżdiedlu u lanqas jitnaqqaslu,

u ma jeħtieġ il-parir ta’ ħadd.

22X’għaxqa fihom l-għemejjel tiegħu kollha!

U minnhom ma tidhirx ħlief xrara!

23Kollha jgħixu u jibqgħu għal dejjem,

kollha meħtieġa, u kollha jisimgħu minnu.

24Kollox tnejn tnejn, wieħed il-maqlub tal-ieħor,

u m’għamel xejn bin-nieqes.

25B’wieħed isaħħaħ it-tajjeb tal-ieħor,

u min se jixba’ jħares lejn sebħu?