1Il-kelma tal-Mulej, li ġiet lil Ġoel bin Petwel.
Swied il-qalb għall-qerda tal-pajjiż2Isimgħu dan, xjuħ,
agħtu widen, intom ilkoll li tgħammru fil-pajjiż!
Ġrat xi ħaġa hekk fi żmienkom,
jew fi żmien missirijietkom?
3Għiduha lil uliedkom,
u wliedkom lil uliedhom,
u wliedhom lin-nisel ta’ warajhom.
4Dak li ħalla l-ġrad qattiegħ,
kielu l-ġrad gerriem.
Dak li ħalla l-ġrad gerriem
kielu l-ġrad qabbież.
Dak li ħalla l-ġrad qabbież
kielu l-ġrad qerried.
5Qumu mir-rqad, ja sakranazzi, u ibku!
Intom li tixorbu l-inbid, newħu lkoll
għall-inbid ġdid, li twarrbilkom minn ma’ fommkom!
6Għaliex għall-pajjiż tiegħi tela’ poplu,
qawwi u bla għadd;
snienu, snien ta’ ljun,
u għandu d-dras ta’ ljunessa.
7Il-qasam tad-dwieli tiegħi għamlu ħerba,
is-siġar tiegħi tat-tin tertaqhom;
qaxqaxhom għalkollox u rmiehom,
il-friegħi tagħhom bjadu.
8Olfoq, kif tagħmel xebba liebsa x-xkejjer,
għall-għarus ta’ żgħożitha!
9L-offerta tal-ikel u tax-xorb inqatgħet
minn dar il-Mulej.
Kollhom niket il-qassisin,
qaddejja tal-Mulej.
10Imħassar ir-raba’,
l-art tbikkik.
Għax inqered il-qamħ,
l-inbid ġdid nixef,
għosfor iż-żejt frisk.
11Infixlu, ħaddiema,
intom li tieħdu ħsieb id-dwieli,
newħu għall-qamħ u x-xgħir,
għax intilef il-ħsad tar-raba’.
12Il-qasam tad-dwieli sfar,
u s-siġar tat-tin dbielu;
is-siġar tar-rummien, tal-palm u tat-tuffieħ,
u s-siġar kollha tar-raba’ nixfu.
Kif għeb il-ferħ minn fost il-bnedmin!Sejħa għall-indiema u għat-talb
13Ilbsu x-xkejjer, qassisin, u olfqu,
ixhru, qaddejja tal-artal!
Ejjew, orqdu bl-ixkejjer fuqkom,
qaddejja ta’ Alla tiegħi!
Għax miżmuma mid-dar ta’ Alla tagħkom
l-offerta tal-ikel u tax-xorb.
14Ordnaw sawma;
sejħu laqgħa mqaddsa;
morru iġbru x-xjuħ,
u n-nies kollha tal-pajjiż
fid-dar tal-Mulej Alla tagħkom.
Għajtu lill-Mulej:
15“Ah, x’jum dan!
Għax fil-qrib Jum il-Mulej,
jasal bħal riefnu mingħand Xaddaj.”
16Forsi mhux quddiem għajnejna
naqas l-ikel,
l-hena u l-ferħ
mid-dar ta’ Alla tagħna?
17Il-qamħ miżrugħ tħassar
taħt it-tub tiegħu;
il-matmuriet saru ħerba waħda,
l-imħażen tal-qamħ iġġarrfu,
għax il-qamħ nixef.
18X’jokorbu l-bhejjem!
Il-baqar jiġġerrew mifxula,
għax m’għandhomx fejn jirgħu.
Sal-imrieħel tan-nagħaġ u l-mogħoż inqerdu.
19Jien ngħajjat lilek, Mulej!
Għax in-nar qered il-ħdura tar-raba’,
ilsna tan-nar ħarqu s-siġar kollha tal-għelieqi.
20Sal-bhejjem tar-raba’ mxennqin għalik,
għax nixfu n-nixxigħat tal-ilma,
għax in-nar qered il-ħdura tal-kampanja.
Who We AreWhat We EelieveWhat We Do
2025 by iamachristian.org,Inc All rights reserved.
