1Faħħru l-Mulej, għaliex hu tajjeb,
għax għal dejjem it-tjieba tiegħu!
2Ħa jgħidu wlied Iżrael:
“Għal dejjem it-tjieba tiegħu.”
3Ħa tgħid dar Aron:
“Għal dejjem it-tjieba tiegħu.”
4Ħa jgħidu dawk li jibżgħu mill-Mulej:
“Għal dejjem it-tjieba tiegħu.”
5Sejjaħt il-Mulej fid-dwejjaq tiegħi;
u l-Mulej weġibni, u ħariġni fil-wisa’.
6La l-Mulej miegħi, m’għandix għax nibża’;
x’jista’ jagħmilli l-bniedem?
7Il-Mulej miegħi, hu l-għajnuna tiegħi,
u nħares b’wiċċi minn quddiem lejn l-għedewwa tiegħi.
8Aħjar tiskenn fil-Mulej
milli tittama fil-bnedmin.
9Aħjar tiskenn fil-Mulej
milli tittama fil-kbarat.
10Il-ġnus kollha dawruni;
imma f’isem il-Mulej irbaħthom.
11Dawruni, minn kull naħa rassewni;
imma f’isem il-Mulej irbaħthom.
12Bħan-naħal daru miegħi,
bħan-nar tax-xewk madwari jħeġġu;
imma f’isem il-Mulej irbaħthom.
13B’saħħithom kollha mbuttawni biex naqa’;
imma l-Mulej tani l-għajnuna.
14Qawwa tiegħi u għana tiegħi l-Mulej;
hu kien għalija s-salvazzjoni tiegħi.
15Għajjat ta’ ferħ u rebħ fl-għerejjex tat-tajbin:
il-leminija tal-Mulej għamlet ħwejjeġ ta’ ħila!
16Il-leminija tal-Mulej ’il fuq merfugħa,
il-leminija tal-Mulej għamlet ħwejjeġ ta’ ħila.
17Ma mmutx, imma nibqa’ ngħix,
u nħabbar l-għemejjel tal-Mulej.
18Ħaqarni tassew il-Mulej,
iżda ma telaqnix għall-mewt.
19Iftħuli l-bibien tal-ġustizzja;
ħa nidħol minnhom u rrodd ħajr lill-Mulej.
20Dan hu bieb il-Mulej;
il-ġusti jidħlu minnu.
21Niżżik ħajr talli weġibtni
u kont għalija s-salvazzjoni tiegħi.
22Il-ġebla li warrbu l-bennejja
saret il-ġebla tax-xewka.
23Bis-saħħa tal-Mulej seħħ dan:
ħaġa tal-għaġeb f’għajnejna.
24Dan hu l-jum li għamel il-Mulej;
ħa nifirħu u nithennew fih!
25Ejja, nitolbuk, Mulej, salvana!
Ejja, nitolbuk, Mulej, agħtina r-riżq!
26Imbierek minn ġej f’isem il-Mulej!
Inberkukom minn dar il-Mulej.
27Jaħweh hu Alla; hu d-dawl tagħna.
Tqassmu f’purċissjoni bil-friegħi f’idejkom
sa ħdejn l-artal.
28Alla tiegħi int, jien niżżik ħajr;
Alla tiegħi, jien lilek inkabbar.
29Faħħru l-Mulej, għaliex hu tajjeb,
għax għal dejjem it-tjieba tiegħu!
Who We AreWhat We EelieveWhat We Do
2025 by iamachristian.org,Inc All rights reserved.
