DEWTERONOMJU 33 - Maltese Bible with DC

Kapitlu 33Il-barka ta’ Mosè

1Din hi l-barka li biha bierek Mosè, il-bniedem ta’ Alla, lil ulied Iżrael, qabel ma miet.

2U qalilhom:

“Ġie mis-Sinaj il-Mulej,

u dehrilna minn Xegħir;

idda mill-għolja ta’ Faran,

ġie minn Meribat-kades,

u fuq lemintu ħuġġieġa nar.

3Tassew iħobb il-poplu tiegħu,

il-qaddisin kollha tiegħu f’idejk,

u huma f’riġlejk joqogħdu,

kull wieħed jiġbor kliemek,

4il-liġi li Mosè tana.

Wirtu l-ġemgħa ta’ Ġakobb,

5u hu s-sultan f’Ġesurun,

meta ltaqgħu l-prinċpijiet tal-poplu

flimkien mat-tribujiet ta’ Iżrael.

6Jgħix Ruben u ma jmutx,

imma jkun żgħir fil-għadd.

7U dan qal għal Ġuda:

Isma’, Mulej, leħen Ġuda,

u wasslu għal ma’ niesu,

għalih innifsu b’idejh jiġġieled;

int l-għajnuna kontra l-għedewwa tiegħu.

8U għal Levi qal:

It-Tummim u l-Urim tiegħek,

agħti lill-bniedem ta’ mħabbtek,

li f’Massa int ġarrabt,

u tlewwimt miegħu ħdejn l-ilma ta’ Meriba.

9Li qal għal missieru u ommu; ‘Ma rajthomx’;

u ’l ħutu m’għarafhomx;

u ’l uliedu ma qishomx.

Għax huma ħarsu kliemek,

u żammew il-patt tiegħek.

10Jgħallmu l-preċetti tiegħek lil Ġakobb,

u l-liġi tiegħek lil Iżrael.

Joffru inċens lil imnifsejk,

u s-sagrifiċċju tal-ħruq fuq l-artal tiegħek.

11Bierek, Mulej, lil Levi,

u ilqa’ xogħol idejh.

Kisser ġenbejn l-għedewwa tiegħu,

ta’ dawk li jobogħduh, biex ma jqumux.

12Għal Benjamin qal:

Il-maħbub tal-Mulej

jgħammar b’moħħu mistrieħ:

Alla l-għoli dejjem jostru,

u taħt ġwenħajh hu jgħammar.

13U għal Ġużeppi qal:

Il-barka tal-Mulej fuq artu,

bil-ġid mill-għoli tas-smewwiet,

u minn qiegħ l-art mifrux minn taħt,

14bil-ġid tal-frott tax-xemx,

15u bl-aħjar ġid imnibbet bl-oqsma,

u bl-aħjar ġid mill-iġbla tal-qedem,

u bil-frott tal-għoljiet ta’ dejjem,

16bil-ġid tal-art u kulma fiha,

u bl-għaxqa ta’ min jgħammar fl-għollieq.

Ħalli jinżlu l-barkiet fuq ras Ġużeppi,

fuq il-qurriegħa tal-magħżul fost ħutu.

17Il-glorja tiegħu bħal ta’ gendus tal-bikri,

qrunu l-qrun ta’ gendus selvaġġ;

bihom il-popli jidrob,

u jgerrixhom sa truf l-art.

Hekk huma l-eluf ta’ eluf ta’ Efrajm,

hekk huma l-eluf ta’ Manassi.

18U għal Żebulun qal:

Ifraħ Żebulun fi ħruġek,

u int Issakar fl-għerejjex tiegħek.

19Il-popli għal fuq il-muntanja jsejħu,

u hemm joffru sewwa s-sagrifiċċji;

u minn tifwir il-baħar jerdgħu,

u mill-għana moħbi fir-ramel.

20U għal Gad qal:

Imbierek min ikabbar lil Gad!

Bħal iljun jimtedd,

u jqarmeċ id-driegħ u r-ras.

21Xeħet għajnejh fuq l-aħjar tal-art;

Sehem ta’ prinċep kien hemm għalih;

iżda ħareġ l-ewwel mal-kbarat tal-poplu;

u għamel il-ġustizzja tal-Mulej,

u l-ħaqq tiegħu ma’ Iżrael.”

22U għal Dan qal:

Dan ferħ ta’ ljun,

jaqbeż jiġri minn Basan.

23U għal Naftali qal:

Naftali mfawwar bil-favuri;

mimli bil-barka tal-Mulej;

wirtek il-baħar u n-Nofsinhar.

24U għal Aser qal:

Aser, l-aktar imbierek fost l-ulied,

ikun il-maħbub fost ħutu,

u jaħsel riġlejh fiż-żejt.

25Ħadid u bronż l-istaneg tiegħek,

u saħħtek kemm iddum ħaj.

26M’hemmx Alla bħalu,

bħal Alla ta’ Ġesurun,

biex jgħinek;

jaqsam riekeb is-smewwiet,

fuq is-sħab bil-glorja tiegħu.

27Kennek Alla ta’ żmien il-qedem,

b’dirgħajh iwieżnek minn taħt.

Minn quddiemek l-għedewwa jkeċċi,

u lilek jordna u jgħid: ‘Eqridhom’.

28U straħ Iżrael fil-kwiet bla biża’;

u weħidha għaliha għajn Ġakobb,

f’art l-inbid u l-qmuħ,

u n-nida tqattar minn smewwietha.

29Hieni int, ja Iżrael;

min hu bħalek,

poplu li ħelsek il-Mulej?

Hu t-tarka ta’ għajnuntek,

u x-xabla ta’ rebħietek.

U jżiegħlu bik l-għedewwa tiegħek,

int u tirfes fuq għoljiethom.”