IL-KTIEB TAL-GĦERF 3 - Maltese Bible with DC

Kapitlu 3L-hena tal-ġusti

1Imma l-erwieħ tal-ġusti huma f’idejn Alla,

u l-ebda tbatija ma tilħaqhom.

2F’għajnejn il-boloh dehru mejta;

it-tluq tagħhom stħajluh b’telfien,

3u qerda t-tbegħid tagħhom minna.

Iżda huma qegħdin fis-sliem.

4Għax, għalkemm f’għajnejn il-bnedmin dehru maħqura,

għandhom tama sħiħa fil-ħajja bla tmiem.

5Wara ftit ta’ tbatija jiksbu ġid kbir;

għax Alla ġarrabhom

u sabhom tajbin għalih.

6Bħad-deheb fin-nar ġarrabhom,

u laqagħhom bħal vittma maħruqa kollha għalih.

7Meta Alla jiġi għalihom, huma jiddu,

bħal xrar tan-nar li jżiġġ f’għalqa bil-qasab.

8Jagħmlu ħaqq mill-ġnus u jaħkmu fuq il-popli,

u jkun il-Mulej is-sultan tagħhom għal dejjem.

9Min jittama fih jifhem is-sewwa,

u min jemmen fih jgħix miegħu fl-imħabba;

għax tjieba u ħniena hemm għall-magħżulin tiegħu.Il-kastig tal-ħżiena

10Imma l-ħżiena jieħdu l-kastig li ħaqqhom għal ħsibijiethom,

talli warrbu l-bniedem ġust u tbiegħdu mill-Mulej.

11Tassew imsejkna huma dawk li jmaqdru l-għerf u t-tagħlim;

fiergħa t-tama tagħhom,

bla fejda t-taħbit tagħhom, bla siwi għemilhom;

12bla moħħ in-nisa tagħhom,

u ħżiena wliedhom;

misħut kollu n-nisel tiegħu.

13Imma hienja l-mara bla wlied, li ma tkunx tebbgħet ġieħha,

u li ma kellha x’taqsam ma’ ħadd bid-dnub;

dik ikollha l-ħlas meta Alla jżur il-bnedmin.

14Hekk ukoll l-ewnuku, li qatt ma għamel ħsara b’idejh,

lanqas ma żamm ħsibijiet ħżiena kontra l-liġi tal-Mulej;

hu jkollu premju magħżul għall-fedeltà tiegħu,

u post, li bih jitgħaxxaq, fit-tempju tal-Mulej.

15Sabiħ hu frott l-imġiba tajba,

u l-għerq tal-għerf ma jinxef qatt.

16Iżda wlied iż-żina ma jagħtu frott qatt,

u nisel id-dnub ma jasal qatt sat-tmiem.

17Imqar jekk jgħixu ħajja twila, ħadd ma jagħti kashom;

bla ġieħ tkun xjuħithom fl-aħħar jiem.

18U jekk imutu żgħar, ma jkollhomx tama,

lanqas faraġ f’jum il-ħaqq;

19għax nisel il-ħażen jintemm ħażin.