SALMI 58 - Maltese Bible with DC

Salm 58Kundanna tal-imħallfin ħżiena

1Għall-mexxej tal-kor. Fuq “La teqridx”. Ta’ David. Miktam.

2Intom, kbarat, qegħdin tagħmlu ħaqq sewwa?

Qegħdin tiġġudikaw sewwa l-bnedmin?

3Le, anzi f’qalbkom il-ħażin taħsbu,

fuq l-art dnewwa jxerrdu jdejkom.

4Minn ġuf ommhom il-ħżiena qabdu triq ħażina,

minn twelidhom żbaljaw dawk li jgħidu l-gideb.

5Għandhom semm bħal dak tas-serp,

bħal tal-lifgħa truxa, li ssodd widnejha,

6biex ma tismax is-sejħa tas-saħħar,

imqar jekk isaħħar b’sengħa kbira.

7O Alla, farrkilhom snienhom f’ħalqhom,

kisser dras il-frieħ tal-iljun, Mulej.

8Ħa jgħibu bħal ilma li jintrema,

bħal ħaxix jintrifsu u jinxfu.

9Ikunu bħal bebbuxu li jinxef u jintemm,

bħal tarbija barra minn żmienha li ma tarax ix-xemx.

10Qabel ma tinħass is-sħana tax-xewk jaqbad,

ħajjin ikaxkarhom bis-saħna ta’ għadbu.

11Jifraħ il-ġust xħin jara l-ħaqq iseħħ,

saqajh jaħsel fid-demm tal-ħżiena.

12U kulħadd jgħid: “Tassew hemm ħlas tajjeb għall-ġust;

tassew li hemm Alla jagħmel ħaqq fuq l-art.”