ĠOB 18 - Maltese Bible with DC

Kapitlu 18It-tieni diskors ta’ Bildad

1Wieġeb imbagħad Bildad is-Suħi u qal:

2“Kemm se ddum bħalek taqla’ kawtieli?

Agħti ftit widen, ħallina nkellmuk.

3L-għala nitqiesu minnek bħala bhejjem,

u fil-fehma tiegħek ma niswew xejn?

4Int li tifni ruħek bil-korla tiegħek,

taħseb li għandha tintelaq minħabba fik id-dinja

jew jitqanqal minn postu l-blat?

5Imma żgur jintefa d-dawl tal-ħażin,

u l-fjamma tan-nar tiegħu ma tiddix aktar.

6Inin id-dawl fl-għarix tiegħu,

u l-lampa ta’ fuq rasu tintefa.

7Jiqsaru l-passi qawwija tiegħu,

u l-fehma tiegħu stess iġġarrfu.

8B’riġlejh stess jidħol fix-xibka,

fuq il-mansab imidd passih.

9Taqbdu ingassa minn għarqubu,

u n-nassa tingħalaq fuqu.

10Moħbi fl-art għalih il-ħabel,

u t-trabokk fil-mogħdija.

11Minn kull naħa jħebb għalih il-biża’,

u jibqa’ jsus wara riġlejh.

12Jgħum fil-ġid imma bil-ġuħ,

u l-qerda tiegħu tistennieh maġenbu.

13Tikollu ġildu marda kerha,

l-iben il-kbir tal-Mewt jirgħa fuq ġismu.

14Jinħataf mill-għarix komdu tiegħu,

u jġorruh għand Sultan il-waħxijiet.

15L-għarix tiegħu jagħtuh in-nar,

fejn kien joqgħod iferrxu l-kubrit.

16Minn taħt jinxfulu għeruqu,

u minn fuq jinxfulu l-friegħi.

17Tgħib mid-dinja tifkirtu,

u fit-toroq ma jkollux isem.

18Iwaddbuh mid-dawl għal ġod-dlam,

u jqaċċtuh minn wiċċ did-dinja.

19Ma jkollux nisel fost il-poplu tiegħu,

lanqas ħadd ma jibqagħlu f’għamartu.

20Għal li ġralu jistagħġbu n-nies tal-Punent,

u dawk tal-Lvant jitkexkxu.

21Iva, dan hu tmiem l-għamara tal-ħażin,

dan imissu min ma jridx jaf b’Alla.”