SALMI 106 - Maltese Bible with DC

Salm 106Stqarrija tal-poplu ta’ Alla

1Hallelujah!

Roddu ħajr lill-Mulej, għax hu tajjeb,

għax għal dejjem it-tjieba tiegħu!

2Min jista’ jsemmi l-għemejjel kbar tal-Mulej,

jew isemma’ t-tifħir tiegħu kollu?

3Hieni min jimxi bid-dritt,

min jagħmel dejjem is-sewwa.

4Ftakar fija, Mulej,

fi mħabbtek għall-poplu tiegħek;

aħseb fija bis-salvazzjoni tiegħek,

5biex nara l-ġid tal-magħżulin tiegħek,

biex nifraħ għall-ferħ ta’ ġensek,

u niftaħar mal-poplu ta’ wirtek.

6Aħna dnibna, bħal missirijietna,

waqajna fil-ħtija, għamilna l-ħażen.

7Missirijietna fl-Eġittu

ma għarfux l-għeġubijiet tiegħek,

ma ftakrux fit-tjieba kbira tiegħek;

u ħaduha kontra Alla l-Għoli ħdejn il-Baħar tal-Qasab.

8Iżda hu salvahom minħabba f’ismu,

biex juri l-qawwa tiegħu.

9Ċanfar lill-Baħar tal-Qasab, u dan nixef;

mexxiehom f’qiegħ il-baħar bħal f’deżert.

10Salvahom minn id dawk li jobogħduhom;

fdiehom minn id l-għedewwa tagħhom.

11L-ilma għatta lil dawk li għakksuhom;

anqas wieħed ma baqa’ minnhom.

12Imbagħad emmnu fi kliemu,

u għana ta’ tifħir għannewlu.

13Iżda malajr insew għemilu;

mank stennew li jseħħ ħsiebu.

14U qabdithom kilba bla lġiem fid-deżert,

u ġarrbu lil Alla fix-xagħri,

15u tahom kulma talbuh,

anzi fgahom bl-ikel sa mnifsejhom.

16Ġiethom l-għira għal Mosè fl-għerejjex,

u għal Aron, il-qaddis tal-Mulej.

17Infetħet l-art u belgħet ’il Datan,

u għalqet taħtha ’l Abiram u ’l sħabu.

18Ħaraq in-nar il-ġemgħa tan-nies tagħhom,

nqerdu l-ħżiena fil-ħuġġieġa tan-nar.

19Għamlu għoġol ħdejn il-Ħoreb,

qiemu xbieha tal-metall imdewweb.

20Bidlu ’l Alla, il-glorja tagħhom,

ma’ xbieha ta’ gendus jiekol il-ħaxix.

21U nsew ’l Alla, li salvahom,

li għamel ħwejjeġ kbar fl-Eġittu,

22għeġubijiet fl-art ta’ Ħam,

ħwejjeġ tal-biża’ fil-Baħar tal-Qasab.

23Kien għamel il-ħsieb li jeqridhom,

li ma kienx għal Mosè, il-magħżul tiegħu,

li waqaf fis-selħa tas-sur quddiemu,

biex iberrdu u ma jeqridhomx.

24Imbagħad maqdru l-art li tgħaxxaq,

għax ma emmnux fil-kelma tiegħu.

25Qagħdu jgergru fl-għerejjex tagħhom,

ma ridux jisimgħu leħen il-Mulej.

26Għalhekk rafa’ idu kontrihom,

b’ħalfa li jmiddhom fid-deżert,

27li fost il-ġnus ixerred ’l uliedhom

u mal-artijiet iferrixhom.

28Huma ngħataw lil Bagħal-pegħor,

kielu mill-vittmi maqtula lill-allat mejta.

29Irrabjawh bl-imġiba tagħhom,

u marda kerha faqqgħet fosthom.

30Qam imbagħad Fineħas u tħallas,

u l-kastig waqaf għalkollox.

31Dan swielu għall-ġid tiegħu,

minn nisel għal nisel, għal dejjem.

32Inkurlawh ukoll ħdejn l-ilma ta’ Meriba,

imqar Mosè weħel minħabba fihom;

33għax huma tellfulu sabru,

u qal dak li ġie fi lsienu.

34Huma ma qerdux il-popli,

kif il-Mulej kien qalilhom;

35imma tħalltu mal-ġnus,

u tgħallmu d-drawwiet tagħhom.

36Taw qima lill-idoli tagħhom,

li saru bħal nassa għalihom.

37Qatlu b’sagrifiċċji lix-xjaten

lil uliedhom subien u bniet.

38Xerrdu demm bla ħtija,

demm uliedhom subien u bniet,

li ssagrifikaw lill-idoli ta’ Kangħan;

u l-art tniġġset bid-dmija.

39Hekk tħassru bl-għemejjel tagħhom,

u żnew bl-imġiba tagħhom.

40Għalhekk inkorla l-Mulej għall-poplu tiegħu,

u stmell il-wirt tiegħu.

41U telaqhom f’idejn il-ġnus,

ħakmuhom dawk li jobogħduhom.

42Għakksuhom l-għedewwa tagħhom,

u kellhom joqogħdu taħt idejhom.

43Ħafna drabi hu ħelishom,

iżda huma webbsu rashom miegħu,

u ġġarrfu bil-ħażen tagħhom.

44Iżda hu ħares lejn l-hemm tagħhom,

xħin sama’ t-tnehid tagħhom.

45Ftakar fil-patt tiegħu magħhom;

u fit-tjieba kbira tiegħu ħenn għalihom.

46U għamel li jsibu l-ħniena

minn dawk kollha li kienu jassruhom.

47Salvana, Mulej, Alla tagħna,

u iġmagħna minn fost il-ġnus,

biex irroddu ħajr lill-isem qaddis tiegħek

u niftaħru bit-tifħir tiegħek.

48Imbierek il-Mulej, Alla ta’ Iżrael,

minn dejjem għal dejjem!

Ħa jgħid il-poplu kollu: “Ammen!”

Hallelujah!