BIN SIRAK 13 - Maltese Bible with DC

Kapitlu 13Tħallat ma’ min hu bħalek

1Min imiss il-qatran jitħammeġ,

u min ikollu x’jaqsam ma’ bniedem kburi jsir bħalu.

2Terfax toqol li ma tiflaħx għalih,

u qis li ma jkollokx x’taqsam

ma’ min hu b’saħħtu, u għani aktar minnek.

X’għandha x’taqsam ġarra ma’ kitla?

Jekk jaħbtu, hi ssir frak.

3Jiżbalja l-għani, u minn fuq jibda jhedded,

imma jekk xi ħadd jiżbalja kontra l-fqir,

dan ikollu saħansitra jitlob skuża.

4L-għani met’għandu bżonnok, jinqeda bik,

imma meta jkun jonqsok xi ħaġa, jitilqek.

5Meta għandek il-ġid, jiġi jgħix miegħek;

jerdagħlek ġidek bla ma jagħti kas.

6Ikollu bżonnok, u jqarraq bik,

jitbissimlek, u jimliek bit-tama;

jgħidlek ħwejjeġ sbieħ u jistaqsik: ‘Għandek bżonn xi ħaġa?’

7U jġagħlek tistħi bl-ikel li jagħtik,

sakemm ikun ħadlek kollox għal darbtejn tlieta,

u fl-aħħar jiddieħek bik.

Meta mbagħad jarak, jitbiegħed minnek,

u jibda jċaqlaq rasu għalik.

8Qis li ma titqarraqx,

li ma tiġix umiljat minħabba fi bluhatek.

9Jekk setgħani jistiednek, żomm lura,

u aktar u aktar jistiednek.

10Tersaqx ’il quddiem, li ma tintefax lura,

u toqgħodx ’il bogħod wisq, li ma tintesiex.

11Titħajjarx iġġib ruħek miegħu bħalkieku kont daqsu,

u temminx il-ħafna kliem li jgħidlek,

għax b’ħafna diskors jipprova jġarrbek;

jitbissimlek u jkun qiegħed jistħarrġek.

12Bla qalb hu dak li ma jżommx kliemu;

ma jeħilsikx mill-moħqrija u mill-irbit.

13Ħu ħsieb u għasses sewwa,

ma’ min irid ifixklek.

14 Meta tisma’ dan stenbaħ min-ngħas tiegħek,

ħobb il-Mulej tul ħajtek kollha,

u sejjaħ lilu għas-salvazzjoni tiegħek.

15Kulma jgħix iħobb ’il min hu bħalu,

u kull bniedem il-proxxmu tiegħu.

16Kull ħlejqa tinġibed għal waħda tal-istess għamla,

u l-bniedem jingħaqad ma’ ħlejqa tixbah lilu.

17X’għandu x’jaqsam lupu ma’ ħaruf?

Daqshekk ieħor il-midneb mat-twajjeb.

18X’għandha x’taqsam il-jena mal-kelb,

u x’għandu x’jaqsam l-għani mal-fqir?

19Il-ħmir selvaġġi fid-deżert huma l-kaċċa tal-iljuni;

hekk ukoll il-fqar il-mergħa tal-għonja.

20Il-kburi jistmell l-umiltà,

u l-għani jistmell il-fqir.

21Meta għani jixxengel, ħbiebu jżommuh sod;

meta l-fqir jaħbat se jaqa’, sa ħbiebu jimbuttawh.

22Meta għani jiżloq, ħafna jgħinuh,

jitkellem kif m’għandux, u jagħtuh raġun;

imma fqir jitfixkel, jgħidu li ħtija tiegħu,

u jekk jitkellem bil-għaqal, ma jagħtuhx widen.

23Jitkellem l-għani, u ħafna jibqgħu siekta,

u l-kelma tiegħu jgħolluha m’ogħla s-sħab,

imma meta jitkellem il-fqir jgħidu: ‘Dan min hu?’

u jekk jitfixkel, ikomplu jwaqqgħuh.

24L-għana hu tajjeb fejn m’hemmx dnub;

imma għal min ma jibżax minn Alla l-faqar hu ħażin.

25Qalb il-bniedem tbiddillu l-bixra ta’ wiċċu,

jew għall-aħjar, jew għall-agħar.

26Wiċċ daħkan jixhed qalb hienja,

imma li titkellem bil-proverbji jitlob ħafna ħsieb.