TOBIT Ħarsa ħafifa lejn il-ktieb - Maltese Bible with DC
Ħarsa ħafifa lejn il-ktiebIl-ktieb ta’ Tobit hu meqjus fost il-kotba tal-għerf minħabba l-kontenut tiegħu li jinġabar mill-istejjer patrijarkali tal-Ġenesi, il-liġijiet ta’ Mosè, u dettalji mill-kotba tas-Slaten u l-profeti. Il-Lhud u l-insara Protestanti ma jqisux dan il-ktieb bħala ispirat.Il-ġrajja prinċipali hi dwar żewġ familji Lhud eżiljati fost il-pagani imma li jibqgħu leali lejn it-tradizzjonijiet ta’ missirijiethom, minkejja kull xorta ta’ tbatija. Hawnhekk, l-awtur mhux magħruf idaħħal dik li tissejjaħ il-liġi tar-retribuzzjoni. Il-Providenza Divina tindaħal biex tpatti bil-ġid għall-provi li minnhom għaddew il-protagonisti tal-ktieb.L-Anġlu Rafel hu r-rappreżentant ta’ Alla li jidħol fil-qalba ta’ dawn iż-żewġ familji u jgħinhom fil-mumenti l-aktar delikati tal-istorja tagħhom. Jieħu d-dehra ta’ bniedem li jakkompanja lil Tobija matul il-vjaġġ tiegħu biex isib l-għarusa li kellha ssir martu, jeħles lil Sara mill-jasar tax-xitan; hu medjatur taż-żwieġ, u jipprovdi għall-fejqan ta’ Tobit. Meta kollox jgħaddi għall-aħjar, Rafel ma jidhirx aktar.L-importanza tal-ktieb mhix daqstant f’kemm l-awtur juża l-immaġinazzjoni tiegħu fid-deskrizzjoni tal-ħajja tal-protagonisti, daqskemm fil-messaġġ li jrid joħroġ. Alla ma jħalli lil ħadd ibati bla bżonn, anzi jinqeda b’din it-tbatija kkawżata minn sitwazzjonijiet realistiċi fil-ħajja ta’ kuljum, u jibdilhom f’mezzi ta’ tkabbir fil-fidi u t-tama. L-awtur jagħfas ħafna, b’mod sottili, l-importanza u l-qawwa tat-talb.Tobija qal “Oħti, qum, ħa nishru u nitolbu quddiem Sidna, li jagħmel ħniena magħna u jsalvana.” Sara qamet u bdew jitolbu bil-ħniena s-salvazzjoni u jgħidu: “Imbierek int, O Alla ta’ missirijietna, u mbrierek ismek għal dejjem ta’ dejjem. Iberkuk is-smewwiet u l-ħolqien kollu għal dejjem ta’ dejjem” (8,4-5).It-taqsim tal-ktiebTobit f’Ninwè u Sara f’Medja jbatu u jitolbu (1,1—3,15)It-talb tagħhom jinstama’ (3,16—11,18)Il-Mulej jibgħat lil Rafel bi tweġiba għat-talb tagħhom (3,16-17)Tobit jagħti pariri lil ibnu Tobija (4,1-21)Rafel jivvjaġġa ma’ Tobija lejn il-Medja (5,1—7,12)Tobija jiżżewweġ lil Sara (7,13—9,6)Rafel jerġa’ lura ma’ Tobija u Sara u jfejjaq lil Tobit (10,1—11,18)Rafel juri l-identità tiegħu (12,1-22)Tobit ifaħħar lil Alla u jkompli jagħti pariri lil Tobija (13,1—14,15)
