PROVERBJI 12 - Maltese Bible with DC

1Min iħobb id-dixxiplina, iħobb it-tagħlim,

imma min jobgħod iċ-ċanfir hu bla moħħ.

2Min hu tajjeb jaqla’ ħniena mingħand il-Mulej,

imma l-brikkun ikun ikkundannat.

3Il-ħżiena ma jkunu qatt fis-sod,

imma għerq il-ġusti ma jinqala’ b’xejn.

4Mara tinqala’ l-foħrija ta’ żewġha,

mara bla ġieħ bħal taħsir f’għadmu.

5Ħsibijiet il-ġusti skont is-sewwa,

imma fehmiet il-ħżiena kollha qerq.

6Bi kliemhom il-ħżiena jonsbu għall-ħajja,

imma kliem it-tajbin iġib il-ħelsien.

7Il-ħżiena jintrebħu u jintemmu,

imma nisel it-tajbin jibqa’ sħiħ.

8Bniedem bil-għaqal ta’ min ifaħħru,

bniedem ta’ qalb mgħawġa ta’ min jistmerru.

9Aħjar wieħed fqajjar li jaqla’ kemm jgħix,

minn wieħed kburi li m’għandux ħobż.

10Il-ġust jieħu ħsieb sal-bhima tiegħu,

imma l-ħażin qalbu kiefra.

11Min jaħdem l-għalqa tiegħu jiekol bix-xaba’,

min jagħtiha għall-frugħat hu bla moħħ.

12Id-dar b’saħħitha tal-ħażin tiġġarraf,

imma nisel it-tajbin iżomm sħiħ sal-aħħar.

13Il-ħażin jinqabad mill-qerq ta’ kliemu,

imma l-ġust jeħles mill-għawġ.

14Bi kliem fommu jirnexxi l-bniedem,

u bix-xogħol ta’ jdejh ikollu l-ħlas.

15Triqtu l-iblah jaraha tajba,

imma l-għaref jieħu parir ħaddieħor.

16L-iblah malajr juri s-saħna tiegħu,

imma l-għaqli jaħbi l-għajb li jħoss.

17Min iħobb is-sewwa jixhed is-sewwa,

imma min jixhed ħażin hu kollu qerq.

18Min iqassas b’ilsienu jinfed bħal sejf,

imma lsien l-għorrief idewwi.

19Kliem is-sewwa jżomm sħiħ għal dejjem,

imma l-ilsien giddieb għomru qasir.

20Il-qerq fil-qalb ta’ min ifassal il-ħsara,

u l-hena f’dawk li jfittxu l-ġid.

21L-ebda ħsara ma tiġi fuq il-ġust,

imma l-ħżiena kollhom għawġ.

22Jistmell il-Mulej lil min hu giddieb,

imma jitgħaxxaq b’min jagħmel is-sewwa.

23Bniedem għaqli jaħbi għerfu,

imma l-iblah ixandar bluhitu.

24Min hu bieżel jimxi ’l quddiem,

imma l-għażżien jibqa’ qaddej.

25L-inkwiet ikiddha qalb il-bniedem,

imma kelma tajba tferraħha.

26Il-ġust jaħrab mill-ħażen,

imma triq il-ħżiena tmexxihom ħażin.

27L-għażżien ma jaqbadx x’jiekol,

imma l-ħabrieka jiksbu ħafna ġid.

28Triq is-sewwa twassal għall-ħajja,

imma l-ħażina tieħu għall-mewt.