ĠOB 22 - Maltese Bible with DC

Kapitlu 22It-tielet diskors ta’ Elifaż

1Wieġbu Elifaż it-Temani:

2“Jista’ l-bniedem jiswa lil Alla?

Jiswielu għallinqas l-għaref?

3X’se żżidlu ’l Xaddaj bil-ħajja tajba tiegħek?

X’se jdaħħal Alla minn imġibtek bla tebgħa?

4Jewwilla għat-tjieba tiegħek li Hu jċanfrek

u jġibek għall-ħaqq tiegħu?

5Mhux għax kbira hi ħżunitek,

u ħtijietek ma ssibx tarfhom?

6Int ħadt ir-rahan lil ħutek għal xejn b’xejn,

u neżżajt għerja lill-imċerċrin.

7Int ċħadt l-ilma lill-għajjenin

u ma tmajtx lill-imġewħin.

8Int għax tiflaħ ksibt l-art,

u tgħammar fiha b’rasek merfugħa.

9Int bgħatt ir-romol b’idejhom vojta,

u sħaqt dirgħajn l-iltiema.

10Għalhekk tara nases madwarek,

u biża’ li jaħkmek għal għarrieda.

11Jew kont taħseb li ma tarax id-dlam,

u li ma jgħerrqikx l-għargħar?

12Mhuwiex Alla l-Ogħla tas-sema,

u jara ras il-kwiekeb li huma fl-għoli?

13U int tiġi tgħid: ‘X’jaf Alla?

Kif jista’ jiġġudika b’dak is-sħab iswed?

14Jgħattih is-sħab u ma jħallihx jara,

fuq il-ħnejja tas-sema Hu jimxi.’

15Trid int taqbad it-triq il-mudlama,

li għaddew minnha n-nies il-ħżiena,

16nies li nħatfu qabel żmienhom,

meta xmara ġarrfet is-sisien tagħhom?

17Dawn qalu ’l Alla: ‘Ħallina bi kwietna;

x’jista’ jagħmel Xaddaj għalina?’

18Iżda kien Hu li mela bil-ġid lil djarhom,

għad li ħsieb il-ħżiena mbiegħed minnu.

19Jaraw dan il-ġusti u jifirħu,

dawk ta’ bla ħtija jiddieħku u jgħidu:

20‘Ġie fix-xejn il-kobor tagħhom,

u l-ġid tagħhom belgħu n-nar.’

21Erġa’ lejn Alla, agħmel ħbieb miegħu,

u mbagħad ikollok riżq tajjeb.

22Ilqa’ t-tagħlim ħiereġ minn fommu,

u aħżen ġo qalbek kliemu.

23Jekk iddur lejn Xaddaj terġa’ tintrafa’;

jekk tbiegħed minn darek id-dnewwa,

24jekk tarmi fit-trab id-deheb tiegħek,

u qalb iċ-ċagħak tal-wied id-deheb fin tiegħek,

25ikun Xaddaj id-deheb tiegħek,

u l-ħażniet tal-fidda tiegħek.

26Issib f’Xaddaj l-għaxqa tiegħek

u lejn Alla int terfa’ wiċċek.

27Xħin titolbu Hu jagħtik widen,

u int troddlu l-wegħdiet tiegħek.

28Kulma trid tagħmel jirnexxilek,

għax jiddi d-dawl fuq mogħdijietek.

29Jekk ibaxxuk, għid: ‘Jiġi l-qawmien,’

għax jingħata l-għajnuna min ibaxxi rasu.

30Alla jeħles lil kull min hu bla ħtija,

u int tinħeles għas-safa ta’ jdejk.”