PROVERBJI 23 - Maltese Bible with DC

1Meta tkun qed tiekol ma’ xi ħadd kbir,

aħseb sewwa min għandek quddiemek;

2u jekk int wikkiel ħafna,

agħmel sikkina ma’ gerżumtek.

3Tixxennaqx għall-ikel bnin tiegħu,

għax hu ikel li jqarraq bik.

4Titħabatx biex tikseb il-ġid,

dan il-ħsieb neħħih minn moħħok;

5kif titfa’ għajnejk fuqu, ikun ġa għadda;

għax żgur irabbi l-ġwienaħ,

u jtir bħal ajkla fl-ajru.

6Tikolx il-ħobż ma’ min hu xħiħ,

tixxennaqx għall-ikel bnin tiegħu;

7għax hu bħal wieħed jgħodd bil-qjies f’qalbu.

Jgħidlek: “Kul u ixrob”,

iżda mhux minn qalbu.

8Il-bukkun li tiekol taqilgħu,

u tkun ħlejt il-kliem sabiħ tiegħek.

9Toqgħodx titkellem ma’ min hu iblah,

għax hu jmaqdar il-kliem għaqli tiegħek.

10Tneħħix il-ġebel qadim ta’ bejn għalqa u oħra,

u tidħolx fir-raba’ tal-iltiema;

11għax min iħarishom qawwi ħafna,

hu jiddefendi kontrik il-kawża tagħhom.

12Żomm moħħok fit-tagħlim,

agħti widen għal kliem id-dehen.

13Tħallix lit-tifel bla twiddib;

mhux se jmut għax issawtu bil-bastun.

14Jekk issawtu bil-bastun,

tkun qed teħilsu mill-mewt.

15Ibni, jekk qalbek tħobb l-għerf,

lili wkoll tferraħli qalbi;

16nifraħ b’qalbi kollha,

meta minn fommok joħroġ is-sewwa.

17Tħallix lil qalbek tgħir għall-midinbin,

iżda ibqa’ kuljum fil-biża’ tal-Mulej.

18Għax hemm ħajja għalik għaż-żmien li ġej,

u t-tama tiegħek ma tkunx fiergħa.

19Isma’, ibni, u kun bil-għaqal,

u agħraf imxi fit-triq it-tajba.

20Tagħmilhiex ma’ dawk li jlegilgu l-inbid,

u ma’ dawk li għandhom kilba għal-laħam;

21għax l-ikel u x-xorb żejjed iwasslu għall-faqar,

u min iħobb l-irqad iċ-ċraret jilbes.

22Isma’ minn missierek li tak il-ħajja,

u tmaqdarx ’l ommok meta tixjieħ.

23Ixtri s-sewwa u terġax tbigħu;

ikseb l-għerf, it-tagħlim u d-dehen.

24Missier il-ġust għandu ħafna għax jifraħ,

min għandu ibnu għaref jithenna bih.

25Jithennew bik missierek u ommok,

u tifraħ bik dik li wilditek!

26Ibni, agħtini qalbek,

u għajnejk jitgħaxxqu bi triqati.

27Mara żienja hi bir bla qiegħ,

mara ġerrejja bħal bir dejjaq.

28Bħal ħalliel toqgħod tissajja, u

tkattar l-irġiel li jibdlu ’l marthom.

29Min hu fl-għali jew fin-niket?

Min hu fil-ġlied u fl-inkwiet?

Min hu msawwat bla ma jaf għaliex?

Min għandu għajnejh ħomor nar?

30Dawk li jdumu jixorbu l-inbid,

dawk li jfittxu jduqu x-xorb imħawwar.

31Tħarisx lejn l-inbid meta jkun iħammar,

meta jkun itextex fit-tazza.

32Jinżillek ħelu, u mbagħad bħal serp jigdmek,

u bħal lifgħa jniggżek.

33Għajnejk jaraw kollox bil-maqlub,

u minn moħħok joħroġ kliem imħawwad.

34Tkun qisek mimdud fuq wiċċ il-baħar,

bħal wieħed mitluq mal-art fuq ġifen.

35U thewden: ‘Laqtuni, imma ma ħassejtx;

sawtuni, imma ma weġġajtx.

Xħin niġi f’tiegħi,

nerġa’ mmur infittex l-inbid.’