1Għall-mexxej tal-kor. Fuq “La teqridx.” Miktam. Ta’ David, meta Sawl bagħat in-nies jgħassulu f’daru biex joqtlu.
2Eħlisni mill-għedewwa, o Alla tiegħi,
ħarisni minn dawk li jqumu għalija.
3Eħlisni minn dawk li jagħmlu l-ħażen,
salvani min-nies qattiela.
4Għax huma jinħbew biex jonsbuli ħajti,
nies qalila jinġemgħu kontrija;
u dan, Mulej, bla tort u bla ħtija tiegħi.
5aGħalkemm jien bla ħtija,
huma jiġru u jlestu għalija.
6aImma int, Mulej tal-eżerċti, Alla ta’ Iżrael,
5bqum, ejja u ara b’għajnejk.
6bStenbaħ biex tħallas il-ġnus kollha;
la tħennx għal min jagħmel il-ħażen bil-qerq.
7Jersqu kull filgħaxija, jinbħu bħal klieb,
jiġġerrew ’l hawn u ’l hemm mal-belt.
8Arahom, kliemhom ibaqbaq fuq fommhom,
kliem li jniggeż fuq xufftejhom.
“Min se jismagħna?” huma jgħidu.
9Imma int, Mulej, tidħak bihom,
il-ġnus kollha biċ-ċajt teħodhom.
10Qawwa tiegħi, jiena lilek nistenna,
għax inti, Alla, fortizza tiegħi.
11Alla tiegħi, imħabba tiegħi, jiġi jilqagħni;
jurini Alla l-għedewwa tiegħi mirbuħa.
12Eqridhom, o Alla, biex ma jinsiekx il-poplu tiegħi,
ferrixhom u xejjinhom bil-qawwa tiegħek;
int, Sidi, it-tarka tagħna!
13Għal dnub fommhom u għal kliem xufftejhom
jinqabdu fi kburithom;
għall-kliem ta’ saħta u ta’ gideb jinsteħtu.
14Temmhom b’qilltek, temmhom biex ma jkunux iżjed,
biex kulħadd jagħraf li Alla jaħkem fuq Ġakobb
sa trufijiet l-art.
15Jersqu kull filgħaxija, jinbħu bħal klieb,
jiġġerrew ’l hawn u ’l hemm mal-belt.
16Jiġġerrew u jimirħu biex isibu x’jieklu;
u jekk ma jixbgħux, tismagħhom jinbħu.
17Iżda jien ngħanni lill-qawwa tiegħek;
ngħanni ferħan filgħodu fit-tjieba tiegħek
għax int sirt fortizza għalija,
kenn tiegħi f’jum id-dwejjaq.
18Qawwa tiegħi, lilek ferħan ngħanni;
għax inti, Alla, fortizza tiegħi,
Alla tiegħi, imħabba tiegħi!
Who We AreWhat We EelieveWhat We Do
2025 by iamachristian.org,Inc All rights reserved.
