ISAIJA 19 - Maltese Bible with DC

Kapitlu 19L-oraklu fuq l-Eġittu

1Oraklu fuq l-Eġittu:

“Arawh il-Mulej riekeb fuq sħaba ħafifa u dieħel l-Eġittu;

jitriegħdu l-allat tal-Eġittu quddiemu,

u qalb l-Eġittu tinħall ġo fih.

2U nkeskes l-Eġizzjani kontra l-Eġizzjani,

jitqabdu wieħed kontra ħuh,

u ieħor kontra sieħbu;

belt kontra belt, u saltna kontra saltna.

3Toħroġ ruħ l-Eġittu minn ġo fih,

u jien inħawwadlu ħsiebu;

u jmorru jistħarrġu l-allat u s-saħħara,

l-erwieħ u l-bassara.

4Jien nerħi l-Eġittu f’idejn sid kiefer,

u sultan bla qalb għad jaħkem fuqu,

oraklu ta’ Sidi l-Mulej tal-eżerċti.

5U jinxtorob l-ilma tal-baħar,

u x-xmara tinxef u tixxotta għalkollox;

6u s-swieqi jintnu u l-widien tal-Eġittu joforgħu u jinxfu;

il-qasab u l-ħaxix jidbielu.

7Il-ġummar fi xtut in-Nil jintelaq,

u l-miżirgħa kollha fuq xtut in-Nil

tinxef, tittajjar, tgħib.

8Jokorbu s-sajjieda u jitniehdu;

kull min jixħet fin-Nil is-sunnara,

jew jifrex ix-xbiek fuq wiċċ l-ilma, isewwed qalbu.

9Jitħawdu l-ħaddiema tal-kittien,

u l-maxxata u n-nissieġa jisfaru.

10L-għażżiela tal-qoton jintelqu,

u l-ħaddiema mikrija b’diqa f’qalbhom.

11Tassew boloh il-prinċpijiet ta’ Sogħan!

L-aqwa għorrief tal-Fargħun parir iblah tawh.

Kif tistgħu tgħidu lill-Fargħun:

‘Bin l-għorrief jien, bin is-slaten tal-qedem’?

12Fejnhom issa l-għorrief tiegħek?

Ħa jgħidulek u jgħarrfuk

x’għandu f’moħħu għall-Eġittu

il-Mulej tal-eżerċti.

13Bliehu l-prinċpijiet ta’ Sogħan,

tqarrqu l-prinċpijiet ta’ Nof.

Il-kapijiet tat-tribù tiegħu

lill-Eġittu ħarġuh ’il barra mit-triq.

14Xeħet ġo nofshom il-Mulej spirtu ta’ tagħwiġ,

u ħawdu lill-Eġittu f’kulma għamel.

F’kulma għamel ħarġu lill-Eġittu ’l barra mit-triq,

bħalma jitlef triqtu l-bniedem fis-sakra hu u jitqalla’.

15Xejn ma jsir fl-Eġittu,

la mir-ras u lanqas mid-denb,

la mill-palma u lanqas mill-qasba.

16Dakinhar l-Eġittu jkun bħan-nisa, imriegħed u mwerwer, hu u jmidd idu għal fuqhom il-Mulej tal-eżerċti.

18Dakinhar ikun hemm ħamest ibliet fl-art tal-Eġittu jitkellmu lsien Kangħan u jaħilfu b’isem il-Mulej tal-eżerċti; waħda minnhom tissejjaħ Belt ix-Xemx.

19Dakinhar ikun hemm artal għall-Mulej f’nofs l-art tal-Eġittu u plier f’ġieħ il-Mulej f’tarf l-art.

20U jkun ta’ sinjal u xhieda għall-Mulej tal-eżerċti fl-art tal-Eġittu. Meta jsejħu lill-Mulej minħabba dawk li jaħqruhom, hu jibagħtilhom salvatur, li jaqbeż għalihom u jeħlishom.

21U jgħarraf il-Mulej lilu nnifsu lill-Eġizzjani; u l-Eġizzjani jagħrfu dakinhar lill-Mulej, iservuh bil-vittmi u l-offerti, u jagħmlu l-wegħdi lill-Mulej u jrodduhom.Żak 14,16-18.

22U l-Mulej isawwat lill-Eġittu, isawtu u jfejqu. Huma jerġgħu lura għal għand il-Mulej, u hu jikkalma u jfejjaqhom.

23Dakinhar ikun hemm triq mill-Eġittu għall-Assirja, u l-Assirja tiġi l-Eġittu u l-Eġittu jmur l-Assirja, u l-Eġizzjani jservu lill-Mulej flimkien mal-Assiri.

24Dakinhar Iżrael ikun it-tielet mal-Eġittu u l-Assirja, barka f’nofs l-art.Ġen 12,2.

25Iberikhom il-Mulej tal-eżerċti u jgħid: “Imbierek l-Eġittu l-poplu tiegħi, l-Assirja xogħol idejja, u Iżrael il-wirt tiegħi.”