MIKEA 7 - Maltese Bible with DC

Kapitlu 7Nuqqas ta’ ħaqq kullimkien

1Imsejken jien! Għax sirt

bħal min irid jiġbor il-frott tas-sajf,

qisni tilqit wara qtigħ l-għeneb:

ebda għanqud ma ssib x’tiekol,

jew xi tina bikrija milli nħobb jien!

2Għab il-bniedem twajjeb mill-pajjiż,

u ħadd ġust fost il-bnedmin.

Kulħadd jissajja għad-dmija,

kulħadd jonsob xibka għal sieħbu.

3Idejhom qegħdin biex jagħmlu l-ħsara;

il-prinċep u l-imħallef jittallbu rigali,

u l-kbir jitkellem kif jogħġob lilu;

kulħadd iħawwad.

4U l-aħjar fosthom qishom xewka,

l-aktar nies sewwa fosthom qishom ħarġa ħurrieq.

Jasal jum l-għases tiegħek,

il-kastig tiegħek,

imbagħad tiġihom it-taħwida.

5Tafdawx f’għajrkom,

isserrħux raskom fuq il-ħbieb.

Oqgħod attent li ma tiftaħx fommok

ma’ dik li tistrieħ fi ħdanek.

6Għax l-iben imaqdar lil missieru,

il-bint tqum għal ommha,

il-mara kontra omm żewġha,

u l-għedewwa tal-bniedem ikunu nies daru.

7Imma jien nittama fil-Mulej,

nistenna ’l Alla tas-salvazzjoni tiegħi,

Alla tiegħi jismagħni.Sijon imżebilħa mill-għadu

8Tifraħ xejn minħabba fija, għadu tiegħi,

għax jien, jekk waqajt, nerġa’ nqum;

jekk ninsab fid-dlam,

Alla d-dawl tiegħi.

9Ladarba ħtejt kontra l-Mulej,

jien nissaporti fuqi l-korla tiegħu,

sa ma jaqta’ l-kawża tiegħi

u jagħmel ħaqq miegħi;

imbagħad hu joħroġni għad-dawl

ħa nara l-għemejjel sewwa tiegħu.

10Meta dik li hi għadu tiegħi tara dan,

hi tinkesa bil-mistħija,

hi li kienet tgħidli:

“Fejn hu Alla tiegħek?”

Jitpaxxew għajnejja biha;

imma hi tkun mgħaffġa bħat-tajn tat-triqat.Jitħabbar it-tiġdid

11Ara jum li jerġgħu jinbnew swarek,

il-jum li jitwasslu fil-bogħod trufijietek,

12il-jum li jiġu għandek

mill-Assirja u sa mill-Eġittu,

minn Tir u sa min-naħa tal-Ewfrat,

minn baħar sa ieħor u minn muntanja sa oħra.

13U l-art issir ħerba,

ħtija ta’ dawk li jgħammru fiha,

minħabba frott għemilhom.

Talba kontra l-ġnus

14Irgħa l-poplu tiegħek taħt ix-xettru tiegħek,

il-merħla, il-wirt tiegħek,

maqtugħa għaliha ġol-foresta,

fil-qalba ta’ ġnejna sabiħa.

Jalla tirgħa f’Basan u f’Gilgħad,

bħal fiż-żmien ta’ dari!

15Urina għeġubijietek,

bħal meta ħriġt mill-Eġittu.

16Il-ġnus jaraw u jitħawdu,

minkejja ħilithom kollha;

iqiegħdu idhom fuq fommhom,

widnejhom jittarrxulhom;

17jilagħqu t-trab bħas-serp,

bħall-bhejjem li jitkaxkru mal-art;

joħorġu mriegħda mill-moħbiet tagħhom,

lejn il-Mulej, Alla tagħna,

jitkexkxu u jibżgħu quddiemek.

Sejħa għall-maħfra ta’ Alla

18Min hu Alla bħalek li jneħħi l-ħażen,

u jaħfer id-dnub lil fdal wirtu?

Hu ma żammx il-korla tiegħu għal dejjem,

għax lilu jogħġbu juri ħniena.

19U hu jerġa’ jħenn għalina,

jixħet ħżunitna taħt saqajh,

jarmi ħtijietna kollha f’qiegħ il-baħar.

20Ġib ruħek ma’ Ġakobb bil-fedeltà,

bil-ħniena ma’ Abraham,

bħalma ħlift lil missirijietna

minn żmien il-qedem.