ĦABAKKUK 2 - Maltese Bible with DC

Kapitlu 2Il-ġust jgħix bil-fedeltà tiegħu

1Se noqgħod għassa f’posti,

se nibqa’ wieqaf fuq it-torri tiegħi,

nistenna ħalli nara x’sejjer jgħidli,

u kif se jwieġeb għall-ilmenti tiegħi.

2Imbagħad il-Mulej wieġeb:

“Ikteb id-dehra,” qalli,

“onqoxha fuq tavlozzi,

hekk li jkun jista’ jħaffef min jaqraha.

3Għax id-dehra sseħħ meta jkun waqtha,

tistenna se ma ttemm, u ma tqarraqx.

Jekk hija ddum ma tasal, int stennieha,

għax tiġi żgur, ma tiddawwarx ma tasal!

4Arah jinfena min m’hux ruħu sewwa,

iżda l-ġust jgħix bil-fedeltà tiegħu.”Is-saħtiet kontra l-għadu

5Gwaj għall-bniedem qarrieq,

u ma jkun qatt fis-sliem il-bniedem kburi,

li jiftaħ ħalqu bħax-Xeol,

u hu bħall-mewt, għaliex ma jixba’ qatt;

jiġma’ għalih kull poplu,

jiġbor għalih kull ġens!

6Tgħid huma lkoll ma jqabblulux taqbila,

għanja niggieża, kliem joqgħodlu sewwa?

U jgħidulu:

L-ewwel saħta

“Ħażin għalih min jiġma’

dak li mhux tiegħu

(kemm se jdum?),

min jgħabbi lilu nnifsu b’ħafna djun!”

7Mhux f’daqqa jqum min dejnek?

Ma jistenbħux dawk li jġagħluk titriegħed,

u ssir il-priża tagħhom?

8Talli ħarbatt il-ġid ta’ bosta ġnus,

il-popli l-oħra lkoll iħarbtu lilek;

għad iħallsuk ta’ demm in-nies li qridt,

tad-deni li ġibt int fuq il-pajjiż

u fuq il-belt u fuq kull min jgħammar fiha!It-tieni saħta

9Ħażin għalih min għal daru jagħmel

xi qligħ miksub ħażin,

biex il-bejta tiegħu jqiegħed fl-għoli,

u hekk ma jħallihiex tintmess mill-ħsara.

10Qerried ta’ bosta popli,

b’għemilek stess waqqajt l-għajb fuq darek,

u tlift lilek innifsek.

11Għaliex sal-ġebla minn ġol-ħajt għad tgħajjat,

u travu mbagħad iwieġeb minn mas-saqaf.It-tielet saħta

12Ħażin għalih min jibni belt bid-demm,

italla’ belt fuq sisien il-ħażen!

13Jaqaw mhux mill-Mulej tal-qtajja’ ġej,

li l-popli jitgħabbew bix-xogħol għan-nar,

u l-ġnus jaħlu saħħithom għal xejn?

14Għax l-art kollha kemm hi

għad tagħraf sewwa l-glorja tal-Mulej,

bħalma hu miksi l-baħar bl-ilmijiet!Ir-raba’ saħta

15Ħażin għalih min jisqi l-proxxmu tiegħu,

min iferragħlu s-semm sa jġagħlu jisker,

bil-ħsieb li jħares lejn għawaru!

16Int bl-għajb timtela u tixba’, u mhux bil-ġieħ.

Mel’ixrob int ukoll,

ħa turi ruħek bla ħtin!

Għad idur lejk il-kalċi

tal-id il-leminija tal-Mulej,

u l-għajb jgħattilek ġieħek.

17Id-deni li għamilt lil-Libanu

għad jgħarraq lilek;

il-qerda li ġibt inti fuq il-bhejjem

għad twerwer lilek;

għad iħallsuk ta’ demm in-nies li qridt,

tad-deni li ġibt int fuq il-pajjiż

u fuq il-belt u fuq kull min jgħammar fiha.Il-ħames saħta

18Xbieha minquxa x’fejda jkun hemm fiha

biex min jonqoxha joqgħod isawwarha?

X’tiswa xbieha mdewba,

u l-ħabbar giddieb,

biex jista’ jafda fiha min jagħmilha

u joqgħod jaħdem idoli mbikkmin?

19Ħażin għalih min jgħid lil biċċa għuda:

“Stenbaħ min-ngħas,” jew: “Qum” lil ġebla siekta!

Dan hu t-tagħlim!

Arah, xogħol intarsjat bid-deheb u l-fidda,

iżd’ebda nifs ta’ ħajja m’hemm ġo fih.

20Iżda l-Mulej fit-tempju mqaddes tiegħu;

iskot quddiemu, art, kollok kemm int.