BIN SIRAK 43 - Maltese Bible with DC

Kapitlu 43Ix-xemx

1Għaxqet is-smewwiet il-firmament fis-safa tiegħu;

hekk, f’wirja ta’ glorja, jidhru s-smewwiet.

2Meta tidher ix-xemx tħabbar hi u tielgħa:

‘Ħaġa tal-għaġeb, għemil l-Għoli!’

3F’nofsinhar tikwi l-art,

u min jiflaħ joqgħod għas-sħana tagħha?

4Hemm min jaħdem għas-sħana qawwija tal-forn;

imma x-xemx tisreġ fuq il-muntanji għal tliet darbiet aktar;

hi titfa’ arja tikwi u tarmi raġġi jgħammxu l-għajnejn.

5Kbir il-Mulej li għamilha,

u b’kelmtu jħaffilha mixjietha.

Il-qamar

6Il-qamar ukoll hu kollox mal-ħin,

juri x-xhur u jagħmilha ta’ sinjal iż-żmien.

7Mill-qamar jingħata s-sinjal għall-festi,

imnara li tiċkien wara l-milja tagħha.

8Ix-xahar hu msemmi għalih,

jikber b’mod tal-għaġeb hu u jinbidel,

dawl għall-eżerċti fis-smewwiet,

jiddi fil-firxa tas-smewwiet.

Il-kwiekeb

9Ġmiel is-sema sebħ il-kwiekeb,

tiżjin jiddi fl-ogħla smewwiet.

10Bil-kelma tal-qaddis ħadu posthom,

u ma jehdewx mill-għassa tagħhom.

Il-qawsalla

11Ara l-qawsalla u faħħar lil min għamilha,

sabiħa għall-aħħar fid-dija tagħha.

12Idur mas-smewwiet dawramejt fi ħnejja ta’ glorja,

qaws miġbud minn idejn l-Għoli.

L-għeġubijiet tan-natura

13Bil-kmand tiegħu jibgħat ħafif is-silġ,

u jibgħat il-beraq mgħaġġel, skont l-ordni tiegħu.

14Hekk jinfetħu l-imħażen,

u s-sħab jittajjar bħall-għasafar;

15fil-kobor tiegħu jħaxxen is-sħab,

u jsiru frak l-għoqod tas-silġ.

16Mad-dehra tiegħu jitheżżu l-għoljiet,

bir-rieda tiegħu jonfoħ ir-riħ isfel.

17Il-ħoss tar-ragħda tiegħu jheżżeż l-art,

hekk ukoll tempesta mit-Tramuntana u tromba riħ.

18Iroxx is-silġ bħal għasafar neżlin ’l isfel,

u jinżel bħal ġradi li jpoġġu fl-art.

Ġmiel il-bjuda tiegħu jgħammex l-għajnejn,

u meta jagħmel is-silġ il-bniedem jibqa’ miblugħ.

19U jxerred fuq l-art il-ġlata bħal melħ,

tagħqad u ssir qisha ponot tax-xewk.

20Jonfoħ ir-riħ fuq kiesaħ tat-Tramuntana

u jagħqad is-silġ fuq l-ilma,

joqgħod fuq kull roqgħa ilma,

u l-ilma jilbes bħal kurazza.

21Bih jittieklu l-għoljiet u jinkewa d-deżert,

u l-ħxejjex jinħarqu daqskieku bin-nar.

22Ftit ċpar malajr ifejjaq kollox,

u n-nida li tinżel isserraħ mill-għomma.

23Bil-ħsieb meqjus tiegħu mmansa l-abbiss,

u ħawwel gżejjer fih.

24Dawk li jaqsmu l-ibħra jitkellmu fuq il-perikli tiegħu,

u nistagħġbu b’dak li jisimgħu widnejna.

25Għax hemm ħwejjeġ tal-għaġeb ma jitwemmnux,

kull xorta ta’ bhejjem u ħlejjaq kbar tal-baħar.

26Bl-għajnuna tal-Mulej, il-messaġġier tiegħu jagħmel vjaġġ tajjeb,

u b’kelma tiegħu kollox iżomm flimkien.

27Ngħidu kemm ngħidu ma naslux biex ngħidu kollox,

imma fi ftit kliem: “Hu kollox”.

28Imnejn se tiġina l-ħila li nsebbħuh?

Għax hu l-Kbir, akbar mill-għemejjel kollha tiegħu.

29Tal-biża’ l-Mulej u ta’ kobor bla qjies,

u tal-għaġeb il-qawwa tiegħu.

30Intom li ssebbħu l-Mulej, għolluh kemm tifilħu,

għax jistħoqqlu aktar minn hekk,

u b’ħilitkom kollha faħħruh,

tegħjewx għax qatt ma taslu biex tfaħħruh biżżejjed.

31Min qatt rah biex jista’ jitkellem fuqu?

U min jista’ jfaħħar kburitu daqs kemm jistħoqqlu?

32Ħafna ħwejjeġ moħbija huma akbar minn dawn,

għax aħna rajna biss ftit mill-għemejjel tiegħu.

33Għax kollox għamel il-Mulej,

u lit-twajbin tahom l-għerf.