SALMI 105 - Maltese Bible with DC

Salm 105It-tjieba ta’ Alla ma’ Iżrael

1Faħħru l-Mulej u xandru ismu,

għarrfu lill-ġnus bl-għemejjel tiegħu.

2Għannulu u doqqulu,

xandru l-għeġubijiet tiegħu kollha.

3Ftaħru bl-isem qaddis tiegħu;

tifraħ il-qalb ta’ dawk li jfittxu l-Mulej.

4Ħabirku biex tagħrfu l-Mulej u l-qawwa tiegħu,

fittxu ’l wiċċu l-ħin kollu.

5Ftakru fil-ħwejjeġ kbar li għamel,

fl-għeġubijiet u l-ġudizzji tiegħu.

6Nisel Abraham, il-qaddej tiegħu,

ulied Ġakobb, il-maħtur tiegħu,

7Jaħweh hu Alla tagħna!

Mal-art kollha l-ġudizzji tiegħu!

8Jiftakar għal dejjem fil-patt tiegħu,

fil-kelma li ta għal elf nisel,

9fil-patt li għamel ma’ Abraham,

fil-wegħda li ħalef lil Iżakk,

10li ġedded lil Ġakobb b’liġi,

lil Iżrael b’patt għal dejjem,

11meta qal: “Lilek nagħti l-art ta’ Kangħan,

bħala sehem wirtkom.”

12Ftit kienu għadhom jgħoddu,

ma kinux ħlief ftit barranin f’dik l-art,

13jiġġerrew minn ġens għal ieħor,

minn saltna għal għand poplu ieħor.

14Hu ma ħalla ’l ħadd jaħqarhom;

slaten rażżan minħabba fihom:

15“Tmissux ’il dawk li huma kkonsagrati lili,

tagħmlux deni lill-profeti tiegħi.”

16Imbagħad bagħat il-ġuħ fuq l-art,

qerdilhom il-qamħ minn wiċċ ir-raba’ tagħhom.

17Kien bagħat qabilhom raġel,

’il Ġużeppi, mibjugħ bi lsir.

18Rabtulu riġlejh bil-ktajjen,

dawrulu l-ħadid ma’ għonqu,

19sakemm seħħ dak li kien ħabbar,

u l-kelma tal-Mulej rebbieħ ħarġitu.

20Is-sultan bagħat iħollu,

dak li jaħkem il-popli ħelsu.

21Għamlu sid fuq id-dar tiegħu,

ħallielu f’idejh ġidu kollu,

22biex jgħallem hu stess lill-kbarat,

u juri l-għerf lill-kapijiet tiegħu.

23Imbagħad Iżrael niżel fl-Eġittu,

Ġakobb għex barrani fl-art ta’ Ħam.

24U kattar ħafna l-poplu tiegħu,

saħħu aktar mill-għedewwa tiegħu.

25Dawrilhom qalbhom biex jobogħdu l-poplu tiegħu,

biex jimxu bil-qerq mal-qaddejja tiegħu.

26Bagħat lil Mosè, il-qaddej tiegħu,

u lil Aron, li hu kien għażel.

27Wera bihom għeġubijietu,

ħwejjeġ tal-għaġeb fl-art ta’ Ħam.

28Bagħat id-dlam, u dalam;

iżda huma webbsu rashom għal kliemu.

29Biddlilhom l-ilma f’demm,

qerdilhom il-ħut tagħhom.

30Arthom imtliet biż-żrinġijiet,

sa ġol-kmamar tas-slaten tagħhom.

31Mal-kelma tiegħu ġew qtajja’ ta’ dubbien,

u nemus ma’ arthom kollha.

32Tahom is-silġ minflok ix-xita;

ilsna tan-nar ileħħu f’arthom.

33Laqtilhom id-dwieli u s-siġar tat-tin,

qerdilhom is-siġar tar-raba’ tagħhom.

34Mal-kelma tiegħu ġew il-ġradijiet,

ġradijiet żgħar li ħadd ma jgħoddhom.

35U belgħu l-ħxejjex kollha f’arthom,

kielu l-frott tar-raba’ tagħhom.

36Qatel l-ulied il-kbar kollha ta’ arthom,

l-ewwel frott tas-saħħa tagħhom.

37Ħariġhom mgħobbija bil-fidda u d-deheb,

ħadd ma kien għajjien fit-tribù tagħhom.

38Ferħu l-Eġizzjani bit-tluq tagħhom,

għax fuqhom kien waqa’ l-biża’ tagħhom.

39Firex sħaba biex ikenninhom,

xegħel in-nar għad-dawl billejl.

40Talbuh u bagħtilhom is-summien;

temagħhom sax-xaba’ bil-ħobż mis-sema.

41Xaqqaq blata u minnha ħareġ l-ilma,

li ġera mad-deżert bħal xmara.

42Għax ftakar fil-kelma qaddisa tiegħu,

u f’Abraham, il-qaddej tiegħu.

43U ħareġ bil-ferħ lill-poplu tiegħu,

b’għajjat ta’ ferħ lill-magħżulin tiegħu.

44U tahom artijiet il-ġnus,

u xogħol il-popli wirtuh huma,

45biex iħarsu l-kmandamenti tiegħu,

u jżommu l-liġijiet tiegħu.

Hallelujah!