ISAIJA 5 - Maltese Bible with DC

Kapitlu 5Il-parabbola tal-għalqa tad-dwieli

1Ħa ngħanni lill-maħbub tiegħi

l-għanja ta’ mħabbtu għall-għalqa tad-dwieli tiegħu.

Il-maħbub tiegħi kellu għalqa tad-dwieli

fuq għolja għammiela.

2Għażaqha u naddafha miż-żrar,

u ħawwel fiha dwieli mill-aħjar;

bena torri f’nofsha,

u wkoll ħaffer magħsar fiha.

Stennieha tagħmel l-għeneb tajjeb,

iżda kulma għamlet kien għeneb qares.

3U issa, intom li tgħammru f’Ġerusalemm,

irġiel ta’ Ġuda,

agħmlu intom ħaqq bejni u bejn l-għalqa tad-dwieli tiegħi.

4X’kien fadalli nagħmel għall-għalqa tiegħi

u ma għamiltux?

Stennejtha tagħmel għeneb tajjeb,

u kulma għamlet kien għeneb qares.

5U issa ħa nurikom

x’sejjer nagħmel jien lill-għalqa tiegħi tad-dwieli.

Inneħħilha l-ilqugħ ta’ madwarha,

u jħarbtuha;

iġarrfilha l-ħajt,

biex in-nies tgħaffiġha.

6Nagħmel minnha xagħra;

ħadd ma jiżborha jew jaħdimha,

u jinbet fiha x-xewk u l-ħurrieq.

Jien ngħid lis-sħab

biex ma jagħmilx xita fuqha!

7Għax l-għalqa tad-dwieli tal-Mulej tal-eżerċti

hija d-dar ta’ Iżrael;

u l-irġiel ta’ Ġuda

huma l-mixtla tal-għalqa tiegħu.

Huwa stenna l-ġustizzja,

u araw sab it-tixrid tad-demm,

stenna s-sewwa,

u araw sama’ l-għajjat tal-maħqura.

Il-kastig tal-ħżiena

8Gwaj għal dawk li jżidu dar ma’ dar,

u jgħaqqdu għalqa ma’ għalqa,

sakemm ma jibqax aktar wisa’

u tibqgħu tgħammru weħidkom f’nofs il-pajjiż!

9Jien smajt b’widnejja l-Mulej tal-eżerċti:

“Naħlef li dawn il-ħafna djar isiru ħerba,

djar kbar u sbieħ,

u ħadd ma jgħammar fihom.

10Għax għaxar fiddien dwieli jagħtu bat wieħed;

u ħomer żerriegħa jagħmlu efa.”

11Gwaj għal dawk li jbakkru filgħodu,

u jiġru għal wara s-sokor;

jiddawru billejl sa ma jisħnu bl-inbid.

12Kitarra u arpa, tanbur u flawt,

u nbid x’jixorbu fl-ikliet tagħhom,

u xejn ma jaħsbu f’għemil il-Mulej,

u għemil idejh ma jagħtux kasu.

13Għalhekk il-poplu tiegħi jitturufnawh,

għax hu poplu bla moħħ.

U l-kbarat tiegħu bil-ġuħ imutu,

tinxef bil-għatx il-kotra tiegħu.

14Għalhekk iwassa’ x-Xeol griżmejh

u jiftaħ ħalq daqsiex,

u fih jinżlu n-nobbli u l-kotra,

u l-għajjat u t-tbahrid tal-belt.

15Jiċċekken il-bniedem,

jitgħakksu l-uħud,

u jitniżżlu għajnejn l-imkabbrin.

16U l-Mulej tal-eżerċti jitkabbar f’jum il-ħaqq,

u Alla l-Qaddis jitqaddes bil-ġustizzja.

17Imbagħad jirgħu l-ħrief bħallikieku f’mergħathom,

u l-gidjien jixtarru qalb il-ħrieb.

18Gwaj għal dawk li jiġbdu l-ħażen lejhom bil-ħbula tal-barrin;

u d-dnub bil-ħbula tal-karrijiet.

19Gwaj għal dawk li jgħidu:

“Ħa jfittex jagħmel li għandu jagħmel

ħalli narawh;

ħa joqrob u jseħħ ħsieb il-Qaddis ta’ Iżrael,

ħalli nagħrfuh!”

20Gwaj għal dawk li jsejħu tajjeb il-ħażin,

u ħażin it-tajjeb;

u jibdlu d-dlam mad-dawl,

li jibdlu l-morr mal-ħelu,

u l-ħelu mal-morr.

21Gwaj għad dawk li huma għorrief f’għajnejhom,

u mingħalihom għandhom id-dehen.

22Gwaj għal dawk qalbiena għal xorb l-inbid,

u rġiel jinqalgħu għat-taħlit ta’ xorb is-sokor.

23Gwaj għal dawk li jeħilsu l-ħati mit-tixħim;

u mid-dritt tiegħu jċaħħdu l-bniedem sewwa.

24Għalhekk kif ilsien in-nar jikkonsma l-qasab,

u bħalma l-ħaxix niexef in-nar jibilgħu,

hekk għerqhom għad jitħassar,

u n-nwar tagħhom bħat-trab jittajjar.

Għax huma warrbu l-liġi tal-Mulej tal-eżerċti

u stmerrew il-kelma tal-Qaddis ta’ Iżrael.

25Għalhekk xegħlet il-korla tal-Mulej għall-poplu tiegħu

u medd idu fuqu u darbu;

u theżżu l-muntanji,

il-katavri tagħhom sfaw bħaż-żibel f’nofs it-triq.

B’danakollu ma waqfitx il-korla tiegħu,

u mimduda għandha idu.L-invażjoni ta’ Iżrael

26U għolla stendard lill-ġens mill-bogħod;

u saffarlu minn truf l-art;

arawh ġej ħafif ħafif.

27Ħadd minnhom mhu għajjien, ħadd ma jogħtor;

ħadd ma jongħos, ħadd mhu rieqed.

Ħżiem ġenbejhom mhux merħi,

u lanqas maħlula l-qafla ta’ qrieqhom.

28Misnuna l-vleġeġ tagħhom,

u qwieshom kollha miġbuda;

bħaż-żnied dwiefer iż-żwiemel tagħhom,

bħal riefnu r-roti ta’ karrijiethom;

29it-tgargir tagħhom bħal tal-iljun,

bħal-frieħ l-iljun igargru

jgħajtu u jaħtfu l-priża,

jaħarbu biha u ħadd ma jeħodhielhom;

30Jgħajtu għalih dakinhar,

bħall-għajjat tal-baħar.

U jħares lejn l-art, u ara, dalma u diqa,

u d-dawl imdallam bis-sħab iswed tagħha.