ĠOB 21 - Maltese Bible with DC

Kapitlu 21Tweġiba ta’ Ġob

1Ġob wieġeb u qal:

2“Isimgħuni, isimgħuni kelma,

u jkunli dan il-faraġ tagħkom.

3Stabru bija, ħalluni nitkellem,

u xħin nispiċċa ddieħku kemm tridu.

4Jewwilla ma’ bniedem li għandi xi ngħid jien?

M’għandix forsi għax nitlef sabri?

5Araw xi ġrali u għandkom titbikkmu,

u tqiegħdu jdejkom fuq fommkom.

6Għax jien imqar naħseb biss nibqa’ mnixxef,

u taqbadni tkexkixa ma’ ġismi kollu.

7L-għala l-ħżiena ħajjithom twila,

u kulma jmorru jikbru fis-setgħa?

8Imqabbda fis-sod il-familja tagħhom:

missirijiethom għadhom magħhom,

u wliedhom taħt għajnejhom.

9Djarhom fiż-żgur, m’għandhomx minn xiex jibżgħu,

mhuwiex fuqhom il-bastun ta’ Alla.

10Inissel il-barri tagħhom u ma jfallix,

tferragħ il-baqra tagħhom u ma tkorrix.

11Jerħu ż-żgħar tagħhom jimirħu bħall-ħrief,

u lit-tfal tagħhom jogħxew fiż-żfin.

12Jgħannu biċ-ċetra u t-tanburlin,

u jixxalaw bid-daqq tal-flawt.

13Jgħadduha tajjeb ħajjithom kollha,

u jinżlu bis-sliem fl-Imwiet.

14U dawn qalu ’l Alla: ‘Ħallina bi kwietna,

minn triqatek ma jimpurtaniex.

15X’inhu Xaddaj biex aħna nobduh?

X’se ndaħħlu jekk nitolbuh?’

16M’għandhomx forsi l-ħżiena xortihom f’idejhom

għalkemm ħsiebhom imbiegħed minn Alla?

17Kemm-il darba ntfiet il-lampa tal-ħżiena,

jew messithom il-ħsara li ħaqqhom,

jew qassmitilhom uġigħ il-korla ta’ Alla?

18Kemm minnhom saru bħat-tiben mar-riħ,

jew bħal sifja maħtufa mir-riefnu?

19Tgħidu: ‘Alla jerfa’ l-kastig tagħhom għal uliedhom’;

le, ngħidilkom, lill-ħati jmissu jagħtih ħalli jitgħallem,

20ħa jaraw għajnejh stess il-kalċi tiegħu,

u jixrob huwa nnifsu mill-korla ta’ Xaddaj.

21Għax x’jimpurtah minn daru wara mewtu,

meta jkun għalaq l-għadd ta’ xhuru?

22Tgħiduli: ‘Se jgħallem xi ħadd l-għerf lil Alla,

Hu li jagħmel ħaqq mill-ogħla ħlejjaq?’

23Araw: wieħed imut fl-aħjar ta’ saħħtu

kollu hieni u kuntent,

24ġenbejh mimlija bis-simna

u l-mudullun ta’ għadmu tari.

25Ieħor imut bl-imrar ġo qalbu,

mingħajr qatt ma daq xi hena.

26U lkoll xorta fit-trab jimteddu,

’il wieħed u ’l ieħor jiksi d-dud.

27Ara: jiena naf tajjeb ħsibijietkom,

x’qegħdin tfasslu biex tonsbuni.

28Se tgħiduli: ‘Fejn hi issa dar il-prinċep?

Fejnhom issa l-għamajjar tal-ħżiena?’

29Ngħidilkom: ‘Staqsu ’l dawk li siefru,

u tirruftawx it-tagħrif li ġabru.

30Il-ħażin ma jintmessx minn jum il-ħsara,

ikun meħlus xħin tiġi l-korla.

31Ħadd ma jċanfru f’wiċċu għal imġibtu,

ħadd ma jħallsu talli għamel.

32U xħin imorru bih għad-difna,

tmur warajh in-nies bi ħġarha,

u timxi quddiemu folla kbira;

33tagħmillu fuq qabru sahra,

u jkunlu ħelu t-trab tal-wied.’

34Kif tridu, mela, tfarrġuni? Bil-frugħa?

Mhux gideb biss baqa’ fi tweġibkom?”