KOĦÈLET 11 - Maltese Bible with DC

Kapitlu 11Agħmel it-tajjeb dment li tista’

1Ibgħat ħobżok fuq wiċċ il-baħar,

għax wara żmien twil jerġagħlek lura.

2Qassmu f’sebat ishma, anzi fi tmienja,

għax ma tafx xi ħsara tista’ tiġi fuq l-art.

3Jekk is-sħab ikun mgħobbi jagħmel ix-xita;

u jekk siġra taqa’, lejn in-Nofsinhar jew it-Tramuntana,

hemm fejn taqa’ tibqa’.

4Min jgħarrex għar-riħ ma jiżra’ qatt,

u min jagħti kas tas-sħab ma jaħsadx.

5Bħalma ma tafx kif jidħol nifs il-ħajja fl-għadam f’ġuf ta’ mara tqila,

hekk ukoll ma tafx l-għemil ta’ Alla li għamel kollox.

6Iżra’ filgħodu ż-żerriegħa tiegħek,

u tagħtix mistrieħ lil idek filgħaxija,

għax ma tafx liema tinbet, hux din jew l-oħra,

jew jagħtux it-tnejn frott tajjeb xorta waħda.

7Ħelu tassew id-dawl,

u għażiża għall-għajnejn id-dehra tax-xemx.

8Iva, jekk il-bniedem jgħix bosta snin,

ħa jgawdihom kollha,

ħa jiftakar ukoll li ħafna jkunu l-jiem mudlama;

kulma jiġi mbagħad hu kollu frugħa.

9Thenna, o żagħżugħ, fir-rebbiegħa ta’ ħajtek,

u ħa tkun ferħana qalbek f’jiem żgħożitek.

Imxi wara t-taħbit ta’ qalbek,

u wara l-għaxqa ta’ għajnejk.

Iżda kun af li ta’ dan kollu jitolbok kont Alla fil-ħaqq tiegħu.

10Ħarrab ukoll minn moħħok it-tħassib,

u żomm il-ħsara ’l bogħod minn ġismek;

għax it-tfulija u ż-żgħożija buffura riħ.