GĦAMOS 9 - Maltese Bible with DC

Kapitlu 9Is-salvazzjoni tal-ġusti

1Rajt lil Sidi wieqaf ħdejn l-artal u qalli:

“Ħabbat fuq il-kaptelli sa ma jitheżżu l-għatbiet,

u ġarrafhom fuq irjus in-nies kollha;

min jibqa’ ħaj minnhom neqirdu bix-xabla:

ħadd minnhom ma jaħrab,

ħadd minnhom ma jeħles.

2Jekk iħaffru f’Qiegħ l-Art,

minn hemm taħtafhom idi;

jekk jitilgħu fis-smewwiet,

minn hemm inniżżilhom;

3jekk jinħbew fuq il-quċċata tal-Karmel,

hemm infittixhom,

u minn hemm naqbadhom;

u jekk jinħbew minn quddiem għajnejja f’qiegħ il-baħar,

nordna lis-serp jigdimhom;

4u jekk imorru fl-eżilju quddiem l-għedewwa tagħhom,

hemm nordna lix-xabla toqtolhom:

għajnejja jkunu fuqhom għad-deni

u mhux għall-ġid.”

5U Sidi l-Mulej tal-eżerċti

li jmiss l-art u din iddub,

u jibku dawk kollha li jgħammru fiha,

u togħla bħan-Nil,

u terġa’ tinżel bħax-xmara tal-Eġittu;

6li jibni l-għamara tiegħu fl-għoli tas-smewwiet,

u jwaqqaf fuq l-art is-sisien tal-wesgħa tas-smewwiet;

li jsejjaħ l-ilmijiet tal-baħar,

u jferragħhom fuq wiċċ l-art: Jaħweh hu ismu.

7“Mhux bħal ulied Kus intom għalija,

ulied Iżrael?”

Oraklu tal-Mulej.

“Ma ħriġtx jien lil Iżrael mill-Eġittu,

u l-Filistin minn Kaftor,

u n-nies tas-Sirja minn Kir?

8Ara, għajnejn Sidi l-Mulej fuq is-saltna ħatja,

u jien neqridha minn wiċċ l-art,

iżda ma neqridx għalkollox lil dar Ġakobb,”

oraklu tal-Mulej.

9“Ara, jiena nordna, u nqalleb lil dar Iżrael fost il-ġnus,

bħalma jqallbu t-terrapien f’għarbiel,

imma ebda żrara ma taqa’ fl-art.

10Bix-xabla jmutu l-ħatja kollha fost il-poplu,

dawk li jgħidu: ‘Id-deni ma jmissniex, ma jilħaqniex.’

11Dakinhar intalla’ mill-ġdid l-għarix ta’ David,

li sar ħerba waħda,

u rraqqa’ t-tiċrit tiegħu;

nerġa’ ntellagħlu dak li ġġarraf minnu,

u nibnih kif kien fl-imgħoddi,

12biex huma jirtu l-fdal ta’ Edom,

u l-ġnus kollha msemmija għalija,”

oraklu tal-Mulej li għad jagħmel dan.

13“Araw, għad jiġi żmien,”

oraklu tal-Mulej,

“meta min jaħrat jilħaq fuq min jaħsad,

min jagħsar l-għeneb jilħaq fuq min jiżra’;

u l-inbid ġdid iqattar mill-muntanji,

l-għoljiet kollha jkunu jnixxu minnu.

14Irreġġa’ l-poplu tiegħi Iżrael għal li kien;

jibnu l-ibliet meqruda u jgħammru fihom;

iħawlu d-dwieli u jixorbu l-inbid tagħhom;

u jxettlu ġonna u jieklu mill-frott tagħhom.

15U nħawwilhom f’arthom,

u qatt iżjed ma jinqalgħu mill-art li tajthom,”

jgħid il-Mulej, Alla tiegħek.