MIKEA 4 - Maltese Bible with DC

Kapitlu 4Il-Mulej għad isaltan f’Sijon

1Għad jiġri fl-aħħar jiem

li l-għolja ta’ dar il-Mulej

togħla ’l fuq mill-qċaċet tal-muntanji,

u tintrefa’ ’l fuq mill-għoljiet.

Lejha għad jiġu l-popli kollha,

2kotra sħiħa ta’ ġnus għad jiġu u jgħidu:

“Immorru u nitilgħu fuq l-għolja tal-Mulej,

lejn id-dar ta’ Alla ta’ Ġakobb,

biex jgħallimna triqatu,

biex aħna nimxu fi triqtu.

Għax minn Sijon toħroġ il-liġi,

u l-kelma tal-Mulej minn Ġerusalemm.”

3U jkun hu l-imħallef ta’ ħafna popli,

f’idejh ikun id-destin ta’ ġnus setgħana,

imqar l-aktar imbiegħda.

Ix-xwabel tagħhom idewbuhom f’sikek,

u l-lanez tagħhom fi mnieġel.

Il-ġnus ma jisiltux ix-xwabel għal xulxin,

u ma jitħarrġux aktar għall-gwerra.

4Imma kull wieħed jintasab taħt id-dielja tiegħu,

u taħt is-siġra tat-tin tiegħu;

u ma jkunx hemm min iwerwirhom,

għax fomm il-Mulej tal-eżerċti tkellem.

5Għax il-popli kollha jimxu

kull wieħed f’isem l-alla tiegħu;

imma aħna nimxu

f’isem il-Mulej, Alla tagħna,

għal dejjem ta’ dejjem.Il-merħla mxerrda għad tinġabar f’Sijon

6“Dakinhar, oraklu tal-Mulej,

jien niġma’ z-zopop,

u niġbor l-imkeċċijin

u ’l dawk li jien kont ħqart.

7U z-zopop nagħmilhom fdal,

l-imwarrba nagħmilhom ġnus setgħana.”

U l-Mulej isaltan fuqhom

fil-muntanja Sijon,

minn issa u għal dejjem.

8U int, Torri tal-Merħla,

Għolja ta’ bint Sijon,

tasallek u tiġik is-saltna tal-imgħoddi,

is-saltna ta’ bint Ġerusalemm.

Assedju, turufnament u ħelsien ta’ Sijon

9Issa għalfejn dan il-biki kollu?

Ma hemmx sultan ġo fik?

Jaqaw il-kunsillier tiegħek għab,

biex qabdek uġigħ il-mara fil-ħlas?

10Tkagħweġ bl-uġigħ, bint Sijon,

infaqa’ bil-biki, bħal mara fil-ħlas,

għax issa se toħroġ barra mill-belt,

u tibda tgħammar fil-kampanja.

Inti se tmur Babilonja:

hemm teħles, hemm jifdik il-Mulej

minn idejn l-għedewwa tiegħek.

Il-ġnus midrusa fuq il-qiegħa ta’ Sijon

11Issa nġemgħu kontra tiegħek

ġnus kotrana, li qegħdin jgħidu:

“Ħa titkasbar,

u ħa jitpaxxew għajnejna b’Sijon.”

12Iżd’huma ħsibijiet il-Mulej ma jafuhomx,

il-pjan tiegħu ma għarfuhx;

għax hu ġabarhom qishom qatet fuq il-qiegħa.

13Qum, bint Sijon, u idres,

għax il-qarn jien nagħmilhulek tal-ħadid,

dwiefer saqajk nagħmilhomlok tal-bronż,

u inti tfarrak bosta popli,

tħalli għall-Mulej dak li tikseb minnhom,

u ġidhom lil Sid l-art kollha.Niket u ġieħ għal dar David

14Bħalissa int tinsab marsusa wisq,

għalquna f’assedju;

lill-imħallef ta’ Iżrael

qegħdin jagħtuh b’għasluġ fuq ilħitu.