PROVERBJI 14 - Maltese Bible with DC

1Għerf il-mara jibnilha darha

u bluhitha b’idejha ġġarrafha.

2Min jimxi bis-sewwa għandu l-biża’ tal-Mulej,

min jimxi bl-imgħawweġ jistmerru.

3Kliem l-iblah hu bastun għal dahru,

imma xufftejn l-għorrief il-ħarsien tagħhom.

4Fejn m’hemmx il-baqar, m’hemmx il-qamħ;

b’saħħet il-gendus jinkisbu l-uċuħ tajba.

5Xhud tajjeb ma jgħidx il-falz,

imma xhud qarrieq gideb jgħid.

6Għalxejn l-insolenti jfittex l-għerf,

imma ħafif it-tagħlim għal min hu bil-għaqal.

7Tagħmilhiex ma’ min hu iblah,

għax ma titgħallimx l-għerf minn fommu.

8B’għerfu l-għaqli jsib it-triq it-tajba,

imma bluhiet il-boloh ħażin tmexxihom.

9Il-boloh jibqgħu fil-ħtija,

imma t-tajbin ikollhom l-għaxqa ta’ Alla.

10Qalb il-bniedem tagħraf l-imrar tagħha,

u ħadd barra minnha ma jissieħeb fil-ferħ tagħha.

11Dar il-ħżiena tiġġarraf,

imma l-għamara tat-tajbin tiġi ’l quddiem.

12Xi ħadd jista’ jaħseb li triqtu dritta,

iżda mbagħad tmiemha jwassal għall-mewt.

13Imqar fid-daħk titnikket il-qalb,

u l-ferħ jintemm fin-niket.

14Il-ħażin jixba’ bi frott għemilu,

u t-tajjeb jiekol minn għemejjel idejh.

15Min hu nieqes minn moħħu jemmen kollox,

min moħħu jilħaqlu jara sewwa qabel jemmen.

16L-għaref jaħsibha sewwa u jitbiegħed mid-deni,

imma l-iblah jibqa’ għaddej moħħu mistrieħ.

17Min hu bla sabar bluhat jagħmel,

min hu tal-ħsieb jaf jistenna.

18Il-boloh bluhat jirtu,

imma l-għaqlin jiżżejnu bl-għerf.

19Il-ħżiena jbaxxu rashom quddiem it-tajbin,

u jitbaxxew il-midinbin wara bieb il-ġusti.

20Lill-fqir lanqas qrabatu ma jriduh,

imma l-għani għandu ħafna ħbieb.

21Ħażin jagħmel min imaqdar lil għajru,

imma hieni hu min iħenn għall-fqir.

22Min jagħmel id-deni, mhux żbalji jagħmel?

Min jagħmel il-ġid għandu t-tjieba u l-fedeltà.

23Kull xogħol fih il-qligħ,

imma l-kliem biss faqar iġib.

24L-għaqal hu ġieħ l-għorrief,

u l-bluha tiżjin il-boloh.

25Min jixhed is-sewwa jsalva l-ħajja,

imma l-giddieb hu traditur.

26Tama qawwija jkollu min għandu l-biża’ tal-Mulej,

u wliedu wkoll isibu l-kenn.

27Il-biża’ tal-Mulej hu għajn tal-ħajja,

bih wieħed jeħles mix-xibka tal-mewt.

28Kbir hu s-sultan li għandu poplu kbir

sultan bla poplu ma jiswa għal xejn.

29Min għandu s-sabar jimxi b’għaqal kbir,

min jisbel malajr bluhat kbar jagħmel.

30Mistrieħ il-moħħ hu ħajja għall-ġisem,

imma l-għira tħassarlu l-għadam.

31Min jgħakkes il-fqir imaqdar lil min ħalqu,

imma min iħenn għall-imsejken iweġġħu.

32Il-ħażin jiġġarraf bi ħżunitu,

it-tajjeb jistkenn fi tjubitu.

33L-għerf jgħammar f’moħħ min hu bil-għaqal,

imma ma ssibux f’qalb il-boloh.

34Is-sewwa jkabbar ġieħ il-poplu,

imma d-dnub iwaqqgħu fl-għajb.

35Is-sultan jinġibed lejn il-qaddej bil-għaqal,

imma jistmerr il-qaddej bla ħila.