BIN SIRAK 37 - Maltese Bible with DC

Kapitlu 37Ħbieb tal-isem

1Kull ħabib jgħid: “Jien ukoll ħabibek,”

imma hemm ħbieb tal-isem biss.

2Mhux għali għall-mewt

meta sieħbek jew ħabibek idur kontrik?

3Ja ħsieb ħażin, għalfejn inħlaqt?

Biex tiksi l-art bil-qerq?

4Hemm ħabib li jifraħ bil-ferħ ta’ sieħbu,

imma fi żmien l-għawġ idur kontrih.

5Hemm sieħeb li għal żaqqu jbati ma’ ħabibu,

imma quddiem l-għadu jaqbad it-tarka.

6Ara li moħħok ma jinsiex ’il ħabibek;

u tonqosx li tiftakar fih meta int fil-ġid.Min jagħti parir

7Kull kunsillier ifaħħar il-parir tiegħu;

imma hawn min jagħti parir għall-interess tiegħu nnifsu.

8Ħares ruħek minn min jagħtik parir,

u l-ewwel kun af xi jrid

- għax hu wkoll jaħseb għal rasu -

li ma jmurx itella’ x-xorti kontrik,

9u jgħidlek: “Qiegħed fit-triq it-tajba,”

biex imbagħad iwarrab in-naħa l-oħra jistenna x’se jsir minnek.

10Tiħux parir mingħand min iħarislek minn taħt il-għajn,

u żomm mistur il-pjan tiegħek minn dawk li jgħiru għalik.

11Tiħux parir mingħand mara dwar waħda li għandha għaliha,

jew mingħand beżżiegħi dwar it-taqbid,

mingħand bejjiegħ dwar ix-xiri,

jew mingħand xerrej dwar il-bejgħ,

mingħand l-ingrat dwar radd il-ħajr,

jew mingħand il-kiefer dwar xi għemil ta’ ħniena,

mingħand l-għażżien dwar xi biċċa xogħol,

jew mingħand ħaddiem mikri għal sena dwar it-tmiem ta’ xogħlu,

mingħand qaddej bla ħeġġa dwar xi biċċa xogħol kbira;

toqgħodx fuq dawn għal xi parir.

12Imma ibqa’ l-ħin kollu ma’ bniedem twajjeb,

li int taf li jħares il-kmandamenti;

li jħoss bħalma tħoss int,

u jekk titfixkel jagħli għalik.

13Oqgħod fuq li tgħidlek qalbek,

għax fuq ħadd ma tista’ toqgħod aħjar minnha,

14għax xi drabi l-bniedem qalbu teħbru aħjar

minn seba’ għassiesa fuq torri fl-għoli.

15U barra minn dan itlob lill-Għoli,

li jmexxik dritt fi triq is-sewwa.L-għerf veru u l-għerf falz

16Ir-raġuni hi l-bidu ta’ kull għemil,

u l-ħsieb jiġi qabel kulma tagħmel.

17Bħala sinjal ta’ bidla fil-qalb

erba’ ishma jidhru:

18it-tajjeb u l-ħażin, il-ħajja u l-mewt,

u dak li jaħkem dejjem fuqhom hu l-ilsien.

19Hemm bniedem moħħu jilħaqlu li jgħallem lil ħafna,

imma għalih innifsu ma jiswa xejn.

20Hemm min, għalkemm jinqala’ biex jitkellem, ma jaħmluhx;

u jisfa’ nieqes minn kull ikel,

21ma ngħatatx lilu l-grazzja mill-Mulej,

għax hu nieqes minn kull għerf.

22Hemm min hu għaref għalih innifsu,

u l-frott ta’ għerfu f’fommu biss.

23Bniedem għaref jgħallem lill-poplu tiegħu stess,

u l-frott ta’ għerfu ta’ min joqgħod fuqu.

24Bniedem għaref jimtela bit-tifħir,

u jsejħulu hieni dawk kollha li jarawh.

25Il-ħajja ta’ bniedem titkejjel bl-għadd ta’ jiemu,

imma jiem Iżrael ma jingħaddux.

26Min hu għaref jikseb il-fiduċja tal-poplu tiegħu,

u ismu jibqa’ ħaj għal dejjem.Il-qjies

27Ibni, tul ħajtek qiegħed ruħek fil-prova,

u ara x’inhu ħażin għaliha u tagħtihulhiex;

28għax mhux kollox jgħodd għal kulħadd,

u mhux kulħadd kollox jogħġbu.

29Tkunx wieħed li ma xxebbgħek l-ebda ħaġa bnina,

u tingħatax għall-ikel żejjed,

30għax l-ikel żejjed iġib il-mard,

u l-kilba għall-ikel twassal għad-dardir.

31Ħafna mietu għax ma kilux bil-qjies;

imma min joqgħod attent itawwal ħajtu.