ISAIJA 29 - Maltese Bible with DC

Kapitlu 29Arjel u l-għedewwa tagħha

1Ħażin għalik, Arjel, Arjel,

il-belt fejn David waqqaf il-kamp!

Żidu sena fuq sena,

ħa jgħaddu l-festi fid-dawra tagħhom.

2Jien ngħakkes lil Arjel,

u jkun hemm ilmenti u krib.

Int tkun għalija bħal Arjel.

3U nwaqqaf il-kamp kontrik madwarek,

indawrek bit-torrijiet,

u nħaffer madwarek trunċiera,

u ntella’ għodod tal-gwerra kontrik.

4Nixħtek mal-art, u mill-art titkellem,

u kliemek joħroġ minn ġot-trab;

u leħnek jitla’ mill-art bħal ta’ xi ruħ,

u kliemek tpespes minn ġewwa t-trab.

5Il-kotra tal-għedewwa tiegħek ikunu bħal għabra fina,

u bħal karfa mtajra l-kotra tal-qawwijin.

Jiġri ħin bla waqt,

6li l-Mulej tal-eżerċti jżurek

bir-ragħad, theżżiż u ħsejjes kbar,

b’riefnu u tempesta, u ilsna ta’ nar qerried.

7Tkun bħal ħolma, dehra billejl,

il-kotra kollha tal-ġnus jaħbtu għal Arjel,

dawk li jaħbtu għaliha,

u għal torrijietha u jrossu fuqha.

8U bħal meta wieħed imġewwaħ joħlom li qiegħed jiekol,

u jistenbaħ u jsib ħalqu b’xejn;

u bħal meta wieħed għatxan joħlom li qiegħed jixrob,

jistenbaħ mifni u bi griżmejh niexfa;

hekk jiġrilha l-kotra kollha tal-ġnus li jaħbtu għall-muntanja ta’ Sijon.

L-għama u l-wiċċ b’ieħor ta’ Iżrael

9Stagħġbu u bliehu!

Agħlqu għajnejkom, u ibqgħu għomja;

iskru, mhux bl-inbid,

tbandlu, mhux bix-xorb qawwi!

10Għax il-Mulej xeħet fikom spirtu ta’ ngħas qawwi,

għalqilkom għajnejkom - il-profeti;

u għattielkom raskom - il-viżjunarji.

11Għalikom kull viżjoni ta’ dan kollu tkun bħal kliem ta’ ktieb issiġillat, li jagħtuh lil xi ħadd li jaf jaqra u jgħidulu: “Aqra dan”, u hu jwieġeb: “Ma nistax għax issiġillat.”

14Għalhekk, arani, se nerġa’ nagħmel

l-għeġubijiet ma’ dan il-poplu,

għeġubijiet mill-aktar kbar,

u jintemm l-għerf tal-għorrief tiegħu,

u jgħib id-dehen tad-dehnin tiegħu.”

15Ħażin għal dawk li jaħbu fil-fond fehmithom lill-Mulej,

li għemilhom jinsab fid-dlam,

u jgħidu: “Min se jarana? Min se jagħrafna?”

16X’ħażen magħkom!

Jaqaw il-fuħħari jitqies bħat-tafal,

biex ix-xogħol jgħid fuq min għamlu:

“Mhux hu għamilni!”

u l-fuħħar jgħid fuq il-fuħħari: “Ma jifhimx!”?Il-fidwa ta’ Iżrael

17Mhux tassew li minn hawn u ftit ieħor,

jerġa’ jsir bħal ġnien il-Libanu,

u l-ġnien jitqies bħall-masġar?

18U dakinhar it-torox jisimgħu kliem il-ktieb;

u, meħlusin mis-swied u d-dlam, għajnejn l-għomja jaraw;

19u l-imsejknin jifirħu fil-Mulej,

u l-fqajrin fost il-bnedmin jaqbżu bil-ferħ bil-Qaddis ta’ Iżrael.

20Għax it-tirann għab, u l-insolenti ntemm,

u tqaċċtu dawk kollha li jfittxu d-dnewwa;

21li jwaqqgħu l-ħtija fuq ħaddieħor,

u jonsbu n-nassa lill-imħallef fil-bieb,

u jwarrbu l-ġust għal kull xejn.

22Għalhekk dan jgħid il-Mulej;

hu li feda lil Abraham,

lid-dar ta’ Ġakobb:

“Ma jistħix aktar Ġakobb,

u wiċċu aktar ma jisfarx.

23Għax meta jara lil uliedu,

l-opra ta’ jdejja f’nofsu, iqaddsu ismi;

iqaddsu l-qaddis ta’ Ġakobb,

u jibżgħu minn Alla ta’ Iżrael.

24U dawk li jiżbaljaw f’ruħhom, jiksbu d-dehen,

u dawk li jgemgmu, jiksbu t-tagħlim.”