PROVERBJI 8 - Maltese Bible with DC

Kapitlu 8Is-sejħa tal-għerf

1Mhuwiex isejjaħ l-għerf

u d-dehen mhuwiex qiegħed jgħajjat?

2Fil-quċċata tal-għoljiet matul it-triq,

qagħad l-għerf f’salib it-toroq,

3ħdejn il-bieb, quddiem il-belt,

fid-daħla tal-bieb jgħajjat bil-qawwa:

4“Lilkom, nies, qiegħed insejjaħ,

għall-bnedmin hi l-għajta tiegħi.

5Tgħallmu, ċkejknin, l-għaqal;

nies bla moħħ, ifhmu daqsxejn.

6Isimgħu, għax ħwejjeġ kbar se ngħidilkom,

kliem is-sewwa se joħroġ minn fommi;

7għax fommi jitkellem is-sewwa;

u xufftejja jistmellu l-gideb.

8Kliem fommi hu kollu sewwa,

ma fih ebda tidwir jew tagħwiġ.

9Kollu dritt għal min għandu d-dehen,

kollu sewwa għal min għandu l-għerf.

10It-tagħlim tiegħi ilqa’, u mhux il-fidda,

u l-għerf aktar mid-deheb safi;

11għax l-għerf aħjar mill-qroll aħmar,

mhu xejn ħdejh il-ħaġar prezzjuż.

12Jien, l-għerf, ngħix mal-għaqal,

u nimxi bil-ħsieb u l-qjies.

13Il-biża’ tal-Mulej jobgħod il-ħażen.

Kburija, ksuħat, għemejjel ħżiena,

kliem ta’ ħsara jien nobgħodhom.

14Jiena għandi l-fehma u l-għaqal,

jiena għandi d-dehen u l-qawwa.

15Bil-ħila tiegħi jsaltnu s-slaten,

u l-mexxejja jagħmlu liġijiet tajba.

16Bil-ħila tiegħi jaħkmu l-ħakkiema,

u l-kbarat imexxu l-art.

17Jiena nħobb lil min iħobbni,

jien, min ifittixni jsibni.

18Tiegħi huma l-għana u l-ġieħ,

il-ġid bla tarf u s-saħħa.

19Il-frott tiegħi aħjar mid-deheb fin,

u d-dħul tiegħi aqwa mill-fidda magħżula.

20Jien fit-triq tal-ġustizzja nimxi,

mill-mogħdijiet tas-sewwa ngħaddi,

21nagħti l-ġid lil dawk li jħobbuni,

u nimlielhom il-ħażniet tagħhom.

22Il-Mulej kellu lili sa mill-bidu ta’ għemilu,

sa minn qabel l-eqdem għemejjel tiegħu.

23Sa minn dejjem twaqqaft,

mill-bidu, qabel ma nbdiet id-dinja.

24Kien għad m’hemmx l-ibħra l-kbar, meta tnissilt jien,

kien għad m’hemmx għejun inixxu l-ilma;

25qabel ma tqiegħdu l-muntanji,

qabel l-għoljiet jien twelidt.

26Kien għadu ma għamilx l-art bir-raba’ tagħha,

u lanqas l-ewwel traba tal-art.

27Meta ħejja s-smewwiet jien kont hemm,

meta ħażżeż dawra fuq wiċċ il-baħar kbir,

28meta saħħaħ is-smewwiet hemm fuq,

u qiegħed fis-sod in-nixxigħat ta’ qiegħ il-baħar;

29meta ħażżeż trufijiet il-baħar,

biex l-ilmijiet ma jaqbżux trufhom;

meta qiegħed sisien l-art,

30jien kont maġenbu bħala tfajjel,

l-għaxqa tiegħu, jum wara ieħor,

nitliegħeb il-ħin kollu quddiemu;

31nitliegħeb fuq l-art imħejjija għall-bnedmin,

nitgħaxxaq b’ulied il-bnedmin.

32U issa wliedi, isimgħu lili:

henjin dawk li jimxu fi triqati.

33Isimgħu t-tagħlim u tiksbu l-għerf,

u twarrbux it-tagħlim.

34Hieni l-bniedem li jismagħni,

li jishar kuljum wara biebi,

li jgħasses kuljum mal-għatba ta’ biebi;

35għax min isib lili jsib il-ħajja,

u jikseb l-imħabba tal-Mulej;

36iżda min jitlef lili, hu jbati;

kull min jobgħod lili jħobb il-mewt.”