ĠOB 12 - Maltese Bible with DC

Kapitlu 12Ġob iwieġeb lil Sofar

1Ġob wieġeb u qal:

2“Tassew li intom biss il-bravi,

u l-għerf jispiċċa xħin tmutu intom!

3Imma jien għandi moħħ bħal tagħkom,

xejn ma jiena inqas minnkom.

U min ma jafx ħwejjeġ bħal dawn?

4Iżda sirt jien tad-daħk għal ħbiebi:

‘Arawh, sejjaħ ’l Alla u wieġbu!’

Tad-daħk il-ġust, il-bniedem sewwa!

5‘Agħar għalih il-magħkus,’ jgħid il-paxxut,

‘gambetta għal min riġlu mriegħed.’

6Iżda hemm ir-risq fl-għerejjex tal-ħallelin,

u ħadu r-riħ dawk li jinbxu ’l Alla,

donnhom għandhom ’l Alla f’idhom.

7Issa staqsi ’l-bhejjem u jgħallmuk;

lit-tjur tal-ajru u jgħidulek;

8staqsi lill-ħniex tal-art u jgħallmuk;

u l-ħut tal-baħar ukoll jgħidlek.

9Min fost dawn kollha ma jafx

li id il-Mulej għamlet kollox?

10F’idejh hi ħajjet kulma jgħix,

f’idejh nifs il-ħajjin kollha.

11Forsi l-widna ma ġġarrabx il-kliem

bħalma l-ħalq itiegħem l-ikel?

12Mhux fix-xjuħija ssibu l-għerf?

M’hux il-ħajja twila li ġġib d-dehen?

13Iżda għand Alla hemm l-għerf u l-qawwa,

tiegħu l-parir u tiegħu d-dehen.

14Dak li jġarraf hu, ma jerġax jinbena;

lil min isakkar hu, ħadd ma jista’ jiftaħlu.

15Hu jżomm l-ilmijiet, u taqa’ n-nixfa;

hu jerħilhom, u jifqgħu l-art.

16Fih hemm il-qawwa u l-għaqal,

tiegħu hu min jitqarraq u min iqarraq.

17Hu jibgħat ħafjin lill-kunsillieri,

u jbellah lill-imħallfin.

18Hu jħoll il-ħżiem tas-slaten,

u jdawrilhom ħabel ma’ qaddhom.

19Hu jibgħat ħafja lill-qassisin,

u jniżżel minn posthom lis-setgħanin.

20Hu jbikkem lil dawk li jafu jitkellmu,

u lix-xjuħ jeħdilhom moħħhom.

21Jixħet it-tmaqdir fuq il-kbarat,

u jdgħajjef ħżiem il-qawwijin.

22Hu joħroġ mid-dlam ħwejjeġ mistura,

u fuq id-dlam jixħet id-dawl.

23Jibni l-ġnus u jġarrafhom,

jifrex il-popli u jeqridhom.

24Il-mexxejja tal-pajjiż jeħdilhom id-dehen,

u jitlaqhom jiġġerrew f’deżert bla triq;

25iteftfu fid-dlam mingħajr dawl,

u jixxenglu qishom fis-sakra.