ĠEREMIJA 17 - Maltese Bible with DC

Kapitlu 17L-idolatrija d-dnub ta’ Ġuda

1“Id-dnub ta’ Ġuda miktub

b’pinna tal-bronż,

u b’ponta tad-djamant minqux

fuq it-tavla ta’ qalbhom,

u fuq il-qrun tal-artali tagħhom.

2Biex jiftakru wliedhom fl-artali tagħhom,

u fl-artali tax-xbihat tal-Asera, u s-siġar

iħaddru fuq l-għoljiet għolja

3u l-muntanji fil-wita.

Ġidek u t-teżori tiegħek kollha

nagħtihom bi priża,

għad-dnub li għamilt fuq għoljietek

mal-medda kollha ta’ artek!

4U inti minn jeddek terħi l-wirt li tajtek,

u nġiegħlek taqdi lill-għedewwa tiegħek

f’art li int ma tafx biha.

Għax in-nar tal-korla tiegħi intom xgħeltu,

u jibqa’ mqabbad għal dejjem.”

5Dan jgħid il-Mulej:

“Misħut il-bniedem li jittama fil-bnedmin,

li jfittex il-qawwa tiegħu fil-ġisem,

u titbiegħed qalbu mill-Mulej.

6Ikun bħal siġra tal-għargħar fix-xagħri,

li ma tara ebda ġid ġej,

li tgħammar f’art tikwi fid-deżert,

art mielħa fejn ħadd ma jgħammar.

7Imbierek il-bniedem li jittama fil-Mulej,

u l-fiduċja tiegħu fil-Mulej.

8Ikun bħal siġra ħdejn l-ilma mħawla,

b’għeruqha mxenxla lejn il-wied;

ma tibżax meta tiġi s-sħana,

il-weraq tagħha jibqa’ jħaddar;

fis-sena tan-nixfa ma tinkeddx,

u ma tehdiex milli tagħmel il-frott.

9Fuq kollox qalb il-bniedem kollha qerq

u mħassra. Min jifhimha?

10Jien hu l-Mulej, li nifli l-qalb

u ngħarbel il-ġewwieni,

biex nagħti ’l kull wieħed skont imġibtu,

skont ma jkun jistħoqq għemilu.”Alla, it-tama ta’ Iżrael

11Bħal-ħaġla li tfaqqas il-bajd

li ma tbidx hi;

hekk min jaħżen il-ġid,

imma mhux bis-sewwa;

f’għomru jkollu jħallih,

u fl-aħħar ta’ ħajtu jitqies bħall-iblah.

12Tron ta’ glorja, fl-għoli sa mill-bidu,

hu l-post tal-maqdes tagħna.

13It-tama ta’ Iżrael int, Mulej,

kull min jabbandunak jitħawwad.

Dawk li jitbiegħdu minnu

fit-trab jinkitbu,

għax telqu l-Mulej, l-għajn tal-ilma ġieri.

14Fejjaqni int, Mulej, u jien infiq,

salvani, u jien inkun salv,

għax int il-ftaħir tiegħi.

15Ara x’qegħdin jgħiduli huma:

‘Fejn hi l-kelma tal-Mulej?

Ħa sseħħ!’

16Jien ma qgħadtx irross fuqek għad-deni,

u jum l-hemm qatt ma xtaqtu.

Int taf x’ħareġ minn fommi,

kollox qiegħed quddiemek.

17Tkunx waħx għalija,

int il-kenn tiegħi fi żmien l-hemm.

18Ħa jitħawdu dawk li jsusu warajja,

u ma nitħawwadx jien!

Ħa jitbeżżgħu huma,

u ma nitbeżżax jien!

Niżżel fuqhom Jum id-deni,

u kissirhom għal darba tnejn.Il-ħarsien tas-Sibt

19Dan qalli l-Mulej: “Mur u oqgħod quddiem il-Bieb ta’ Benjamin mnejn jidħlu u joħorġu s-slaten ta’ Ġuda u f’kull bieb ieħor ta’ Ġerusalemm.

23“Imma huma ma ridux jisimgħu u lanqas jagħtu widen, anzi webbsu rashom biex ma jisimgħux u ma jeħdux it-tagħlima.

24“Jekk intom tassew tisimgħu minni, oraklu tal-Mulej, u ma ddaħħlu ebda tagħbija minn bwieb dil-belt f’jum is-Sibt, u tqaddsu jum is-Sibt, u ma tagħmlu ebda xogħol fih,

27“Imma jekk ma tisimgħux minni li tqaddsu jum is-Sibt u li ma ġġorrux tagħbijiet u ma tidħlux minn bwieb Ġerusalemm f’jum is-Sibt, jiena nqabbad nar f’dawn il-bwieb, li jibla’ l-palazzi ta’ Ġerusalemm, nar li ma jintefiex.”