2 KRONAKI 29 - Maltese Bible with DC

Kapitlu 29Is-saltna ta’ Ħeżekija

1Ħeżekija beda jsaltan meta kellu ħamsa u għoxrin sena u baqa’ jsaltan Ġerusalemm għal disgħa u għoxrin sena, u ommu kien jisimha Abija, bint Żakkarija.2 Slat 18,1-3.

2U għamel is-sewwa f’għajnejn il-Mulej bħal kulma kien għamel David missieru.

3Fl-ewwel sena tas-saltna tiegħu, fl-ewwel xahar, fetaħ il-bibien tat-tempju tal-Mulej u sewwiehom.2 Kron 28,24.

4Ġieb il-qassisin u l-Leviti, u laqqagħhom fil-misraħ tal-Lvant

5u qalilhom: “Isimgħuni, Leviti. Issa tqaddsu u qaddsu dar il-Mulej, Alla ta’ missirijietkom, u oħorġu ’l barra t-tinġis mis-santwarju.

6Għax dinbu missirijietna, u għamlu l-ħażin f’għajnejn il-Mulej, Alla tagħna, telquh, u dawru wiċċhom ’l hemm mill-għamara tal-Mulej, u tawh daharhom.

7U saħansitra sakkru l-bibien tal-portiku, tfew l-imnariet, u ma ħarqux aktar l-inċens, u ma offrewx aktar sagrifiċċji fis-santwarju lil Alla ta’ Iżrael.2 Slat 16,15; 2 Kron 2,3.

8Għalhekk għadab il-Mulej waqa’ fuq Ġuda u Ġerusalemm, u għamel minnhom waħx u għaġeb u oġġett għat-tisfir, bħalma taraw b’għajnejkom.Lev 26,32-33; Dt 28,25; Ġer 25,18.

9U araw, waqgħu missirijietna bix-xabla, u s-subien u l-bniet u n-nisa tagħna spiċċaw fil-jasar minħabba dan.

10“Issa għamilt il-ħsieb li nagħmel patt mal-Mulej, Alla ta’ Iżrael, biex iraġġa’ lura s-saħna tiegħu ’l bogħod minna.

11Issa, uliedi, titnikkrux, għax il-Mulej għażilkom biex toqogħdu quddiemu u sservuh, u tkunu l-ministri tiegħu biex taħarqulu l-inċens.”

Il-Leviti jnaddfu t-tempju

12U qamu l-Leviti: Maħat bin Għamaxaj, u Ġoel bin Għażarija, minn ulied il-Keħatin; u minn ulied Merari: Kis bin Għabdi u Għażarija bin Ġeħallelijel: u mill-Gersunin: Ġowaħ bin Żimma u Għeden bin Ġowaħ;

13minn ulied Elisafan: Simri u Ġegħijel; minn ulied Asaf: Żakkarija u Mattanija;

14minn ulied Ħeman: Ġeħijel u Simgħi; minn ulied Ġedutun: Semajja u Għużżijel.

15U ġemgħu lil ħuthom u tqaddsu, u ġew biex inaddfu dar il-Mulej, skont l-ordni tas-sultan fuq il-kelma tal-Mulej.

16U l-qassisin daħlu ’l ġewwa nett fid-dar tal-Mulej biex inaddfuha, u ħarġu l-ħmieġ kollu li sabu fis-santwarju tal-Mulej, fil-bitħa tat-tempju tal-Mulej, u ħaduh il-Leviti biex jeħduh ’il barra lejn il-wied ta’ Kedron.2 Kron 15,16.

17U bdew iqaddsuh fl-ewwel jum tal-ewwel xahar, u waslu ħdejn il-portiku tal-Mulej; u ħadu tmint ijiem oħra biex qaddsu dar il-Mulej, u spiċċaw fis-sittax-il jum tal-ewwel xahar.

18U mbagħad daħlu għand is-sultan Ħeżekija, u qalulu: “Naddafna t-tempju kollu tal-Mulej, u l-artal tas-sagrifiċċju tal-ħruq bit-tagħmir kollu tiegħu, u l-mejda tal-ħobż tal-preżenza bit-tagħmir kollu tagħha.

19U t-tagħmir kollu li Aħaż, is-sultan, kien warrab fis-saltna tiegħu minħabba dnubietu, lestejniehom u qaddisniehom; u hemm huma quddiem l-artal tal-Mulej.”

20U s-sultan Ħeżekija qam kmieni u ġabar il-prinċpijiet tal-belt u tala’ fid-dar tal-Mulej.

21Ġiebu seba’ gniedes, u seba’ mtaten, u sebat iħrief, u seba’ bdabad għas-sagrifiċċju tal-purifikazzjoni għas-saltna, għas-santwarju, u għal Ġuda. U ordna lil ulied Aron, il-qassisin, li joffru s-sagrifiċċji fuq l-artal tal-Mulej.

22U qatlu l-gniedes, u l-qassisin ħadu d-demm u raxxewh mal-artal; u qatlu l-imtaten u raxxew demmhom mal-artal; u qatlu l-ħrief u raxxew demmhom mal-artal;

23imbagħad ressqu l-bdabad għas-sagrifiċċju tal-purifikazzjoni quddiem is-sultan u l-ġemgħa, u qiegħdu idejhom fuqhom.

24Imbagħad il-qassisin qatluhom, u offrew demmhom b’purifikazzjoni tad-dnub fuq l-artal, biex jaqilgħu l-maħfra għal Iżrael kollu, għax is-sultan kien ordna li jsiru sagrifiċċji tal-ħruq u sagrifiċċji tal-purifikazzjoni għal Iżrael kollu.

25U hu qiegħed il-Leviti f’dar il-Mulej biċ-ċnieċel, bl-arpi u biċ-ċetri, skont l-ordni ta’ David, u Gad, il-veġġent tas-sultan, u Natan, il-profeta. Għax mingħand il-Mulej kien ġej l-ordni permezz tal-profeti.

26U l-Leviti qagħdu bl-istrumenti ta’ David, u l-qassisin bit-trombi.

27U Ħeżekija ordna li joffru s-sagrifiċċju tal-ħruq fuq l-artal. Malli beda s-sagrifiċċju, beda l-kant lill-Mulej, u d-daqq tat-trombi msieħba mill-istrumenti ta’ David, is-sultan ta’ Iżrael.

28U l-ġemgħa kollha niżlet wiċċha fl-art tadura, fost id-diwi tal-kant u d-daqq tat-trombi sa ma ntemm is-sagrifiċċju tal-ħruq.

29U xħin intemm is-sagrifiċċju tal-ħruq, is-sultan u dawk kollha li kienu miegħu niżlu wiċċhom fl-art jaduraw.

30U Ħeżekija u l-prinċpijiet ordnaw lil-Leviti li jfaħħru lill-Mulej bi kliem David u Asaf, il-veġġent; u bdew ikantaw għana ta’ tifħir u ferħ, u jaduraw wiċċhom fl-art.

31U Ħeżekija beda jitkellem u jgħid: “Issa li tqaddistu għall-Mulej, ersqu u ġibu vittmi u offerti ta’ radd il-ħajr f’dar il-Mulej.” U l-ġemgħa ġiebu vittmi u offerti ta’ radd il-ħajr, u xi wħud ta’ qalb kbira ġiebu vittmi għas-sagrifiċċju tal-ħruq.Lev 7,11.

32U l-għadd tal-vittmi għas-sagrifiċċju tal-ħruq li ġiebet il-ġemgħa laħaq sebgħin gendus, mitt muntun, mitejn ħaruf - dawn kollha għas-sagrifiċċju tal-ħruq lill-Mulej.

33L-offerti mqaddsa kienu sitt mitt gendus, u tlitt elef nagħġa.

34Imma l-qassisin kienu ftit u ma setgħux ilaħħqu biex jisolħu l-vittmi kollha tas-sagrifiċċju tal-ħruq; u ħuthom il-Leviti għenuhom sa ma ntemm ix-xogħol u l-qassisin laħqu tqaddsu - għax il-Leviti kienu aktar mill-qassisin qalbhom ħerqana biex jitqaddsu.1 Kron 15,12.

35U kien hemm abbundanza ta’ vittmi għall-ħruq, u xaħam tal-vittmi tas-sliem u l-libazzjonijiet tas-sagrifiċċji tal-ħruq. Hekk is-servizz f’dar il-Mulej beda jseħħ mill-ġdid.

36U feraħ Ħeżekija u l-poplu kollu b’dak kollu li l-Mulej għamel għall-poplu, għax kollox sar malajr.