ĠEREMIJA 30 - Maltese Bible with DC

Kapitlu 30Is-salvazzjoni ta’ Iżrael

1Il-kelma li ġiet lil Ġeremija mill-Mulej:

2“Dan jgħid il-Mulej Alla ta’ Iżrael: ikteb fi ktieb il-kliem kollu li għedtlek.

4Dan huwa l-kliem li qal il-Mulej għal Iżrael u għal Ġuda:

5Dan jgħid il-Mulej:

“Smajna għajta tkexkxek,

għajta ta’ biża’, u mhux ta’ sliem!

6Stħarrġu u taraw,

jekk raġel jistax jiled.

Għala mela rajt l-irġiel b’saħħithom,

kollha b’idejhom fuq ġenbejhom,

bħal mara fil-ħlas?

Għala l-uċuħ kollha sfaru?

7Ah! Għax kbir hu dak il-Jum,

u m’hemmx bħalu!

Żmien ta’ diqa jkun għal Ġakobb,

imma minnu joħroġ salv.

8“U f’dak il-Jum, oraklu tal-Mulej tal-eżerċti, inkisser il-madmad tiegħu minn fuq għonqu u nżarrat l-irbit tiegħu, u ma jżommuhx aktar b’ilsir il-barranin., li jien għad inqajmilhom.

10U int, Ġakobb il-qaddej tiegħi, la tibżax,

oraklu tal-Mulej,

u int Iżrael la titrigħedx.

Għax, arani, jien se neħilsek

minn pajjiż ’il bogħod;

u lil nislek minn art jasarhom;

u jerġa’ lura Ġakobb, u jgħix fis-sliem,

u jkun fil-kwiet bla biża’ ta’ xejn.

11Għax jiena miegħek,

oraklu tal-Mulej,

biex insalvak.

Għax nagħmel straġi mill-ġnus kollha,

li f’nofshom jien xerridtek.

Imma minnek ma nagħmilx straġi.

Nikkastigak skont ma ħaqqek;

b’xejn ma nħallikx żgur.

12Għax dan jgħid il-Mulej: Ma hemmx fejqan għalik;

il-ġerħa tiegħek ma tiddewwiex.

13Ma hemmx min jieħu f’idejh il-kawża tiegħek;

għal ġerħitek m’għandekx duwa u fejqan.

14Ħbiebek kollha nsewk, mhumiex ifittxuk.

Għax minħabba l-kotra ta’ dnubietek

sawwattek bħallikieku kont l-għadu tiegħek,

widdibtek bl-aħrax,

għax kibru qatigħ ħtijietek.

15Għalfejn tgħajjat bil-ġerħa tiegħek?

Ma tfiqx mit-tbenġil tiegħek;

minħabba l-kotra ta’ dnubietek;

għax kibru ħtijietek

jien ġibt dan fuqek.

16Għalhekk dawk kollha li belgħuk,

għad jibilgħuhom;

u l-għedewwa tiegħek ilkoll,

għad jispiċċaw fl-eżilju.

Dawk li neżżgħuk

għad ineżżgħuhom;

u dawk li għamlu minnek priża,

għad nagħmel minnhom priża jien.

17U nagħlaqlek ġerħatek,

u nfejqek mit-tbenġil tiegħek,

oraklu tal-Mulej.

Għax sejħulek: “L-abbandunata”,

“Dik Sijon, ħadd ma jfittixha”,

18hekk jgħid il-Mulej:

Araw, se nbiddel ix-xorti ta’ tined Ġakobb,

se nħenn għall-għerejjex tiegħu:

il-belt tinbena fuq l-għolja tagħha;

jerġa’ jitla’ l-palazz fejn kien,

19u minnhom joħroġ għana ta’ radd il-ħajr u għana ta’ ferħ.

Inkattarhom, u ma jkunux ftit;

inkabbarhom u ma jiċkinux.

20U wliedhom ikunu bħal qabel,

u quddiemi tinġabar ġemgħathom.

Jien nikkastiga l-għakkiesa tagħhom.

21U l-prinċep tagħhom ikun wieħed minnhom;

u l-mexxej tagħhom joħroġ minn nofshom.

Jien irressqu lejja u hu jersaq lejja;

għax min se jissogra jersaq lejja minn rajh?

Oraklu tal-Mulej.

22U intom tkunu l-poplu tiegħi,

u jien inkun Alla tagħkom.

23Arawh, ir-riefnu tal-Mulej!

Xegħel għadbu bħal tempesta qawwija,

li se tfaqqa’ fuq ras il-ħżiena.

24Għax is-saħna tal-Mulej ma terġax lura,

qabel ma tkun għamlet u temmet

ħsieb moħħu.

Fl-aħħar jiem għad tifhmuh sewwa.”