ĠOB 16 - Maltese Bible with DC

Kapitlu 16Il-faraġ fieragħ ta’ ħbieb Ġob

1Ġob wieġeb u qal:

2“Ħwejjeġ bħal dawn ili ħafna nisma’,

farraġa msejkna intom ilkoll.

3M’hemmx li jintemm dan il-kliem fieragħ?

U int x’inhu jġagħlek tibqa’ tgħid tiegħek?

4Jien kont naf nitkellem bħalkom,

kieku intom kontu minfloki;

bi kliemi kont nordomkom,

u nħarrek għalikom rasi;

5b’li ngħidilkom kont nirfidkom,

u ma nehdiex inħarrek xufftejja.

6Ukoll jekk nitkellem ma jittaffiex hemmi,

u jekk niskot mhux se jgħaddili.

7Għax issa fnieni dak li għandu għalija,

il-ġemgħa tiegħu kollha qabdet fija.

8Sar xhud u qam kontrija,

dak li infamani jixlini f’wiċċi,

9Iħebb għalija l-għadab ta’Alla u jbiċċirni,

jgħażgħaż għalija snienu,

u jħares lejja biċ-ċiera.

10Fetħu mbagħad ħalqhom kontrija,

bi tkasbir tawni bil-ħarta,

ngħaqdu għalenija kontra tiegħi.

11Alla telaqni f’idejn min jagħmel il-ħażen,

iva f’idejn il-ħżiena rħieni.

12Kont ngħix bi kwieti u għarraqni,

qabadni minn għonqi u għafasni,

ħadni b’mira tal-wadab tiegħu.

13Dawwarni minn kull naħa bil-vleġeġ tiegħu,

qattagħli bla ħniena l-ġewwieni tiegħi,

u ħariġli għal fuq l-art imsarni.

14B’xaqq fuq ieħor qasamni,

bħal gwerrier intafa’ fuqi.

15Ħitt xkora madwar ġildi,

u għaddast rasi fit-trab.

16Minfuħ wiċċi bid-dmugħ,

mgħammxin il-ħbub t’għajnejja,

17għalkemm bl-ebda dnewwa ma ċċappsu jdejja,

u t-talba tiegħi hi sinċiera.

18O art, la tgħattix id-demm tiegħi,

biex ma tindifinx l-għatja tiegħi.

Ġob jappella lil Alla

19“Iva, imqar issa għandi xhud fis-sema,

hemm fil-għoli min jaqbeż għalija.

20Ifisser hu ħsibijieti quddiem Alla

li lejh nerfa’ għajnejja bil-biki

21u jkun l-imħallef bejn bniedem u Alla

bħalma jsir bejn bniedem u għajru.

Krib ieħor ta’ Ġob

22“Jgħaddu s-snin magħduda ta’ ħajti,

u naqbad it-triq li ma nerġax lura minnha.