BIN SIRAK 21 - Maltese Bible with DC

Kapitlu 21Diversi dnubiet

1Ibni, dnibt? Terġax,

u itlob maħfra għal ta’ qabel.

2Kif taħrab minn quddiem serp,

hekk ukoll aħrab id-dnub;

għax jekk tersaq lejh, tingidem;

snienu huma snien ta’ ljun,

u jtertqu ħajja ta’ bniedem.

3Kull ksur tal-Liġi bħal xabla b’żewġt ixfar;

m’hemmx fejqan għall-ġrieħi li tista’ tagħmel.

4Il-prepotenza u l-vjolenza jġibu fix-xejn il-ġid;

hekk titħarbat dar il-kburin.

5It-talba tal-fqir minn fommu għal widnejn Alla,

u l-ħaqq tiegħu jasal bil-ħeffa.

6Min jobgħod ċanfira miexi fi triq id-dnub,

imma min jibża’ mill-Mulej jindem minn qalbu.

7Min hu qawwi fi lsienu jingħaraf mill-bogħod,

imma min jifhem jintebaħ malli jiżloq.

8Min jibni daru bi flus ħaddieħor,

qisu bħal min jiġbor gozz ġebel għal fuq qabru.

9Il-ġemgħa tal-ħżiena hi bħal gozz qanneb,

u tmiemhom ħuġġieġa nar.

10Triq il-midinba mibnija b’ċangaturi tal-ġebel,

imma f’tarfha hemm ħofret l-imwiet.L-għaref u l-iblah

11Min iħares il-Liġi jegħleb il-ġibdiet tiegħu,

imma l-biża’ tal-Mulej iwassal għall-għerf sħiħ.

12Ma jitgħallimx min m’għandux għaqal,

imma hemm għaqal li jkattar l-imrar.

13Tagħlim l-għaref jikber bħal għargħar,

u t-twissija tiegħu bħal għajn ta’ ilma ġieri.

14Qalb l-iblah bħal vażett imxaqqaq;

ebda tagħlim ma żżomm.

15Jekk jisma’ kliem għaref min għandu t-tagħlim,

ifaħħru u jżid miegħu;

jisimgħu min ħajtu jgħaddiha fix-xalar, imma ma jogħġbux,

u jitfgħu wara dahru.

16Diskors l-iblah hu bħal tagħbija fi vjaġġ,

imma fuq fomm bniedem li jifhem tinsab il-ħlewwa.

17Dak li jgħid l-għaqli hu mfittex fil-laqgħat,

u f’qalbhom jibqgħu jaħsbu fuqu.

18Bħal dar li għebet, hekk l-għerf għall-iblah,

u t-tagħlim ta’ min hu bla moħħ hu kliem ma jinftihemx.

19Xkiel mas-saqajn hu t-tagħlim għal ta’ bla moħħ,

u bħal irbit ma’ idu l-leminija.

20L-iblah jidħak jgħajjat,

imma l-bniedem moħħu jilħaqlu jitbissem bil-kwiet kollu.

21Bħal tiżjin tad-deheb hu t-tagħlim għall-għaqli,

u bħal brazzuletta fi driegħu l-lemini.

22Riġel l-iblah jitlaq jiġri lejn dar,

imma bniedem imġarrab jieqaf mistħi quddiemha.

23L-iblah iħares f’dar mill-bieb ’il ġewwa

imma bniedem imrobbi sewwa joqgħod barra.

24Hi mġiba ħażina li bniedem joqgħod jissamma’ ma’ bieb,

u min hu bil-għaqal ma jġerrħux għajb bħal dan.

25Xufftejn il-boloh jgħidu x’qal ħaddieħor,

imma n-nies għaqlija jiżnu kliemhom sewwa.

26Il-boloh huma ta’ żaqqhom f’fommhom,

imma l-għorrief ta’ fommhom f’qalbhom.

27Meta min ma jibżax minn Alla jisħet

l-għadu tiegħu, ikun jisħet lilu nnifsu.

28Iħammeġ ruħu min iseksek,

u jkunu jobogħduh in-nies kull fejn ikun.