EŻEKJEL 15 - Maltese Bible with DC

Kapitlu 15Ġerusalemm bħal dielja mejta

1U ġietni l-kelma tal-Mulej u qalli:

2“O bniedem, x’inhu l-ħatab tad-dielja,

aħjar mill-bqija tal-ħatab,

iż-żarġun li hemm fost is-siġar tal-foresta?

3Forsi jieħdu l-injam minnu,

biex jagħmlu minnu xi biċċa xogħol?

Forsi jieħdu minnu xi kavilja għad-dendil?

4Ara, jitfgħuh fin-nar għall-ħruq,

u trufu t-tnejn jikolhom in-nar,

u n-nofs ukoll jinħaraq.

U meta n-nofs ikun maħruq ukoll,

jista’ jiswa għal xi xogħol?

5Ara, meta kien għadu sħiħ,

ma kien jiswa għal ebda xogħol.

Kemm inqas issa, li kielu n-nar u qerdu,

jista’ jsir xogħol minnu?

6Għalhekk dan jgħid Sidi l-Mulej:

Bħalma l-ħatab tad-dielja,

fost il-ħatab tal-foresta,

jien nitfgħu fin-nar għall-ħruq,

hekk nitlaq lin-nies ta’ Ġerusalemm.

7Indawwar wiċċi kontrihom;

min-nar ħarġu, u n-nar għad jikkunsmahom.

U tkunu tafu li jien il-Mulej,

meta jien indawwar wiċċi kontrihom.

8U nagħmel ħerba mill-pajjiż

talli kisru l-kelma li taw,”

oraklu tal-Mulej.