IL-KTIEB TAL-GĦERF 14 - Maltese Bible with DC

Kapitlu 14Il-baħħara

1Wieħed ilesti biex isiefer,

u jaħseb biex jaqsam imwieġ qalila,

isejjaħ l-għajnuna ta’ biċċa laqxa aktar dgħajfa mill-ġifen li jġorru.

2Għax il-ġifen sar bix-xewqa ta’ qligħ il-flus,

u r-raġel tas-sengħa ħadmu b’għerfu.

3Imma l-providenza tiegħek, Missier, tmexxih;

għax int ftaħt triq fil-baħar ukoll,

u mogħdija bla periklu qalb l-imwieġ.

4Hekk turi li int tista’ teħles minn kull tiġrif,

biex ukoll min ma jifhimx jista’ jbaħħar.

5Inti ma tridx li għemil l-Għerf tiegħek ikun għal xejn;

għalhekk il-bnedmin jafdaw ħajjithom fuq għuda dgħajfa,

u jaqsmu, qawwijin u sħaħ, imwieġ kbar fuq ċattra.

6Hekk ukoll, meta kienu qegħdin jinqerdu l-ġganti l-kbar,

fuq dgħajsa skansat it-tama tad-dinja

u, immexxija minn idek, ħalliet lid-dinja żerriegħa ta’ nisel ġdid.

7Imbierka l-għuda li biha jsir il-ġid!

8Imma l-idolu, maħdum minn għuda b’id il-bnedmin,

misħut hu u min għamlu;

wieħed għaliex ħadmu

u l-ieħor għaliex ħaġa tintemm semmewha alla.

9Għax Alla jobgħod xorta waħda l-ħażen u ’l min jagħmlu;

10l-idolu u ’l min ħadmu jikkastigahom it-tnejn.

11Għalhekk jasal ukoll żmien iż-żjara fuq allat il-ġnus,

għax saru ħwejjeġ mistkerrha fost il-ħlejjaq ta’ Alla;

huma tfixkil għall-erwieħ tal-bniedem,

u nassa għal riġlejn il-boloh.Il-kawża tal-idolatrija

12Il-ħsieb li jsiru l-idoli kien il-bidu taż-żina;

u l-ħajja tħassret għax daħlu huma.

13Fil-bidu huma ma kinux u lanqas jibqgħu għal dejjem.

14Daħlu fid-dinja bil-frugħa tal-bniedem;

għalhekk tmiem ħesrem hemm lest għalihom.

15Xi missier, imnikket għall-mewt ħesrem ta’ ibnu,

għamel xbieha tiegħu, li malajr inħataf minnu,

u beda jqim bħal alla dak li kien bniedem mejjet,

u ordna lil ta’ taħtu jqimuh b’ċerimonji u riti.

16Imbagħad maż-żmien din id-drawwa ħażina ssaħħet u saret bħal liġi;

17u b’ordni ta’ slaten bdiet tingħata qima lix-xbihat minquxa.

Il-bnedmin, li ma setgħux iqimu lis-sultan f’wiċċu

għax kien imbiegħed,

ħażżu xbieha tal-wiċċ li ma kinux jaraw,

u għamlu xbieha li tidher ta’ dak li riedu jqimu,

bix-xewqa li jweġġħu s-sultan imbiegħed bħallikieku magħhom.

18U x-xewqa tal-ħaddiem tas-sengħa li jikseb tifħir,

għenet biex xterdet dil-qima fejn ma kinitx magħrufa.

19Għax jista’ jkun li dan biex jogħġob lil sultan,

ħadimha b’sengħa kbira biex jagħmilha xbieha mill-isbaħ.

20U l-poplu, imsaħħar mis-sbuħija tax-xogħol,

beda jqim bħal alla ’l dak li ftit qabel kien imweġġaħ bħala bniedem.

21Dan sewa ta’ xibka għall-ħajja tal-bnedmin,

li, imjassrin mill-hemm u mis-setgħa tal-mexxej,

taw lill-ħaġra u lill-għuda l-isem, li m’għandu jingħata lil ħadd.Il-korruzzjoni tal-idolatrija

22Ma kienx biżżejjed għalihom li ħarġu mit-triq tat-tagħrif ta’ Alla,

iżda, neqsin mill-għerf, bdew jgħixu fi ġlieda kbira ta’ injoranza,

u dan il-ħażen kollu jsejħulu sliem.

23Għalhekk infexxew fil-qtil ta’ wliedhom b’sagrifiċċji,

jew fir-riti tal-misteri fil-moħbi,

jew f’xalar ta’ mġienen waqt riti strambi.

24La ħajjithom u lanqas iż-żwieġ ma ħarsu bis-safa,

wieħed iqarraq bl-ieħor u joqtlu,

jew ikiddu billi jeħodlu ’l martu.

25Taħwid kull fejn tħares: demm u qtil, serq u qerq;

korruzzjoni, tixwix u infedeltà, u ħalf fil-falz,

26taħwid tat-tajbin, nuqqas ta’ gratitudni,

tniġġis tal-erwieħ, żina kontra n-natura,

taħwid fiż-żwieġ, adulterji u faħx.

27Għax il-qima ta’ allat, li mhumiex ta’ min isemmihom,

hi l-bidu, il-kawża u t-tmien ta’ kull ħażen.

28Nies bħal dawn jew jiġġennu fix-xalar jew iħabbru l-gideb,

jew jgħixu ħajja ħażina jew jaħilfu fil-falz bħallikieku xejn.

29U, billi jafdaw f’allat bla ħajja,

jaħilfu ħażin bla biża’ li tiġi fuqhom xi ħsara.

30Iżda għal żewġ raġunijiet isir ħaqq minnhom:

għax huma u jqimu l-allat, fehmuha ħażin fuq Alla,

u għax kasbru t-tjieba u ħalfu fil-falz u l-qerq.

31Mhijiex is-setgħa ta’ dawk li jaħilfu bihom,

iżda hu l-kastig li jistħoqq lill-midinbin;

dan li dejjem jiġi fuq il-ħżiena wara ħtijiethom.