ISAIJA 28 - Maltese Bible with DC

Kapitlu 28Twiddiba lil Efrajm

1Gwaj għall-kuruna mkabbra tas-sakranazzi ta’ Efrajm,

għaż-żahar midbiel, il-foħrija ta’ sebħu

fuq ras il-wied għammiel,

tal-mitlufin fl-inbid.

2Araw, is-Sid għażel wieħed qawwi u felħan!

Bħal ħalba silġ,

bħal riefnu qerried,

bħal għargħar ta’ ilma, qawwi u qerried,

għad isabbathom mal-art b’kemm għandu saħħa.

3Taħt saqajh jisħaq il-kuruna

tal-kburija tas-sakranazzi ta’ Efrajm.

4U ż-żahar midbiel, il-foħrija ta’ sebħu

li hemm f’ras il-wied għammiel.

Jiġrilu bħal tina bikrija qabel is-sajf:

jaħtafha malli xi ħadd jaraha,

u jiblagħha malli tiġi f’idu.

5Dakinhar ikun il-Mulej tal-eżerċti

kuruna sabiħa u dijadema ta’ ġmiel

għal fdal il-poplu tiegħu;

6spirtu ta’ ġustizzja għal min joqgħod fit-tribunal,

u qawwa għal min jibqa’ jitqabad fil-bieb.

Theddida u wegħda lil Ġerusalemm

8L-imwejjed kollha tqalligħ, ħmieġ kullimkien.

9“Lil min se jgħallem l-għerf,

u lil min se jfiehem il-messaġġ?

Lit-trabi bilkemm maqtugħa minn sider ommhom?

10 Iva: Saw lasaw ; saw lasaw;

kaw lakaw; kaw lakaw;

żegħer sam; żegħer sam.

11Għax b’xufftejn itemtmu, u b’ilsien barrani

jkellem il-Mulej lil dan il-poplu.

12Diġà qalilhom:

“Dan hu l-mistrieħ! Serrħu lill-għajjien!

Dan hu l-faraġ!”

Imma huma ma ridux jisimgħu.

13Din tkun il-kelma tal-Mulej għalihom:

“Saw lasaw; saw lasaw;

kaw lakaw, kaw lakaw;

żegħer sam; żegħer sam.

Biex jimxu u jaqgħu warranijiet

u jitfarrku, jixxebbku, u jinqabdu.

14Għalhekk isimgħu l-kelma tal-Mulej,

nies insolenti,

ħakkiema ta’ dan il-poplu,

hawn f’Ġerusalemm.

15Intom tgħidu: “Aħna għamilna patt mal-mewt,

u ftehim ma’ Art l-Imwiet,

biex meta l-frosta tgħaddi bħall-għargħar

ma tilħaqniex.

Għax għamilna l-gidba l-kenn tagħna,

u l-qerq is-satra tagħna.”

16Għalhekk dan jgħid Sidi l-Mulej:

“Jien inqiegħed fis-sod ġebla f’Sijon,

ġebla magħżula u prezzjuża,

ġebla tax-xewka, imsejsa sewwa,

u min jemmen fiha ma jitħarrikx.

17U nagħmel is-sewwa bħala riegla,

u l-ġustizzja bħala nvell.

Is-silġ iġarraf kenn il-gideb,

u għargħar ta’ ilma jġorr il-moħba.

18Il-patt tagħkom mal-mewt jitħassar;

il-ftehim tagħkom ma’ Art l-Imwiet ma jseħħx;

meta tgħaddi l-frosta ssawwat,

tbattikom mgħaffġin fl-art.

19Kull darba li tgħaddi taħtafkom;

għax għodwa wara għodwa tgħaddi,

binhar u billejl,

u ħaġa tal-biża’ tifhem biss il-messaġġ.

20Għax qasir ikun il-friex biex bniedem jimtedd,

u dejjaq l-għata biex jitkebbeb fih.

21Għax bħalma qam fuq il-muntanja ta’ Perasim,

iqum issa l-Mulej.

Bħalma saħan f’wied Gibgħon,

jisħon issa biex itemm għemilu,

għemil waħdani;

biex jagħmel l-opra tiegħu,

l-opra tiegħu misterjuża.

22U issa tkunux aktar insolenti,

li ma jissikkawx aktar il-ktajjen tagħkom.

Għax jien smajt digriet ta’ qerda,

mingħand Sidi l-Mulej tal-eżerċti,

qerda għal fuq kollha kemm hi l-art.

23Agħtu widen u isimgħu leħni;

oqogħdu attenti u isimgħu kliemi.

24Jaqaw il-bidwi jaħrat il-jum kollu,

jikser u jxattab dejjem l-art?

25Jaqaw ma jwittix wiċċ l-art,

u mbagħad jiżra’ l-ħlewwa u jxerred il-kemmun?

U ma jiżrax il-qamħ fir-raddi,

u x-xgħir għalih u l-qamħ selvaġġ fit-truf?

26Alla tiegħu għallmu sewwa u wrieh kif.

27Mhux bix-xatba jidirsu l-ħlewwa,

anqas rota ta’ karettun ma jdawru fuq il-kemmun;

iżda bil-ħatar iħabbtu l-ħlewwa,

u b’qasba l-kemmun.

28Jaqaw il-qamħ tal-ħobż jinsaħaq?

Le, għax il-bidwi ma jidirsux bla heda,

lanqas ma jibqa’ għaddej bir-romblu tas-slitta tiegħu,

u ż-żiemel tiegħu ma jisħqux.

29Dan ukoll ġej mingħand il-Mulej tal-eżerċti;

u hekk juri l-għaġeb ta’ għaqlu,

u l-kobor ta’ għerfu.