PROVERBJI 5 - Maltese Bible with DC

Kapitlu 5Aħrab il-mara żienja

1Ibni, agħti kas għerfi,

agħti widen għal tagħlimi,

2biex tagħraf iżżomm il-qjies,

u kliemek ikun mogħni bl-għerf.

3Xufftejn il-mara żienja għasel iqattru,

u kliemha mieles aktar miż-żejt;

4imma fl-aħħar hi morra daqs l-assenzju,

taqta’ daqs sejf b’żewġt ixfar.

5Lejn il-mewt jinżlu riġlejha,

lejn qiegħ l-art jieħu l-mixi tagħha.

6Ma tagħtix kas triq il-ħajja,

’l hawn u l’hemm timxi, m’għandhiex kwiet.

7Imma, ibni, isma’ lili,

titbigħedx minn kliem fommi.

8Żomm triqtek ’il bogħod minnha,

u tersaqx qrib bieb darha,

9biex ma titlifx ġieħek quddiem ħaddieħor;

u lanqas titlaq sninek lil xi ħadd bla ħniena,

10biex ma jitpaxxewx b’ġidek il-barranin,

u frott xogħlok imur f’dar ħaddieħor.

11U int toqgħod tokrob fl-aħħar ta’ ħajtek,

huma u jintemmu laħmek u ġismek.

12Imbagħad tgħid: “Kemm kont nobogħdu t-tagħlim,

u ma kontx naħmel it-twiddib!

13Ma smajtx kliem min ried jgħallimni,

ma tajtx widen lil min kien iwissini.

14Kont wasalt biex nitlef kollox

quddiem il-laqgħa tal-ġemgħa!”

15Ixrob l-ilma mill-bir tiegħek,

u l-ilma ġieri min-nixxiegħa tiegħek.

16Trid l-ilma tal-għajn tiegħek jixxerred barra,

u n-nixxigħat tal-ilma f’nofs it-triq?

17Żommhom għalik waħdek,

isseħibx lil ħaddieħor miegħek.

18Tkun imbierka l-għajn tiegħek,

mart żgħożitek! Ifraħ biha.

19Hi bħal ċerva għażiża, bħal għażżiela ħelwa.

Jimliek dejjem bl-għaxqa ż-żegħil tagħha,

issaħħrek bla heda mħabbitha.

20Għaliex tiġġennen, ibni, wara mara oħra,

u tħaddan miegħek mara żienja?

21Quddiem il-Mulej l-imġiba tal-bniedem;

il-Mulej jgħasses il-mixi kollu tiegħu.

22Il-ħażin bi ħżunitu jinqabad,

u bil-ħbula ta’ ħtijietu jintrabat;

23jintemm minħabba n-nuqqas ta’ għaqal,

jintilef minħabba l-bluha kbira tiegħu.