PROVERBJI 29 - Maltese Bible with DC

1Min ikun imwiddeb u jibqa’ jwebbes rasu,

malajr jiġġarraf u ma jkollux fejqan.

2Meta s-setgħa tkun f’idejn il-ġusti, jifraħ il-poplu,

imma meta jaħkmu l-ħżiena, il-poplu jitniehed.

3Min iħobb l-għerf iferraħ lil missieru,

min imur man-nisa żienja jberbaq ġidu.

4Is-sultan bil-ġustizzja jżomm l-art sħiħa,

imma jekk jixxaħħam, iġibha fix-xejn.

5Min iżiegħel b’ħabibu,

ikun jifrixlu xibka għal riġlejh.

6Bi ħżunitu l-ħażin jinqabad f’nassa,

imma l-ġust jiġri u jifraħ.

7Il-ġust jagħraf drittijiet il-fqajrin,

imma l-ħażin dan ma jifhmux.

8L-arroganti jkebbsu n-nar fil-belt,

imma l-għorrief iberrdu l-qilla.

9Jekk l-għaref ikollu xi jgħid mal-iblah,

dan erħilu jgħajjat u jidħak bla waqfien.

10Il-qattiela jobogħduh lil min hu bla ħtija,

iżda l-ġusti jħarsulu ħajtu.

11L-iblah jagħdab b’saħħtu kollha,

imma l-għaref irażżan għadbu.

12Jekk mexxej jagħti kas tal-gideb,

il-kbarat tiegħu kollha jkunu ħżiena.

13Il-fqir u min jaħqru f’dan jaqblu:

lilhom it-tnejn il-Mulej jagħtihom id-dawl.

14Jekk sultan jagħmel ħaqq lill-fqajrin bis-sewwa,

it-tron tiegħu jibqa’ għal dejjem.

15Il-bastun u t-twiddib jagħmlu l-għorrief;

imma tifel mitluq għal riħu jagħmel għajb lil ommu.

16Sakemm jaħkmu l-ħżiena, joktor il-ħażen,

imma l-ġusti jaraw il-waqgħa tagħhom.

17Widdeb lil ibnek, u hu jkun l-hena tiegħek;

ikun l-għaxqa ta’ qalbek.

18Jekk ma jkunx hemm min iwissi,

il-poplu jsir bla rażan;

imbierek hu min iħares il-Liġi!

19Bil-kliem biss ma twiddibx il-qaddej;

għax hu jifhmek, imma ma jobdikx.

20Tara xi wieħed dejjem mgħaġġel biex jitkellem?

Hemm aktar tama għall-iblah milli għalih.

21Min ifissed il-qaddej minn ċkunitu,

fl-aħħar jispiċċa biex jidħol floku.

22Min jagħdab ħafna jqajjem il-ġlied,

u min jisbel jagħmel ħafna żbalji.

23Il-kburija ċċekken il-bniedem,

imma min jiċċekken jikseb il-ġieħ.

24Min jissieħeb mal-ħalliel jobgħod lilu nnifsu;

meta jkun mitlub jaħlef, ma jikxfux.

25Min jibża’ mill-bniedem jaqa’ fi xkiel;

imma min jittama fil-Mulej ikun fil-kenn.

26Ħafna jfittxu l-favuri ta’ min hu kbir;

imma l-Mulej biss jagħmel ħaqq mal-bniedem.

27Il-ġusti jistmellu ’l min hu ħażin,

u l-ħżiena jistmellu ’l min jimxi sewwa.