BÀRUK 4 - Maltese Bible with DC

Kapitlu 4

1Hu ktieb il-kmandamenti ta’ Alla,

hu l-Liġi li tibqa’ għal dejjem;

kull min iħarsu jgħix,

dawk li jħalluh imutu.

2Erġa’ lura, Ġakobb, u ilqa’ l-għerf,

imxi lejn id-dija ta’ dawlu;

3titlaqx il-glorja tiegħek lil ħaddieħor,

lanqas ġieħek lil ġens barrani.

4Hienja aħna, Iżrael,

għax dak li jogħġob ’l Alla kien mgħarraf lilna.Agħmel il-qalb, Iżrael

5Agħmel il-qalb, poplu tiegħi,

int, it-tifkira ta’ Iżrael!

6Kontu mibjugħa lill-ġnus,

iżda mhux biex tiġu fix-xejn;

kontu mogħtija f’idejn l-għedewwa,

għax kebbistu l-korla ta’ Alla.

7Xgħeltu l-għadab ta’ min sawwarkom,

għax offrejtu s-sagrifiċċju lill-allat,

u mhux lil Alla.

8Insejtu lil Alla ta’ dejjem,

lil dak li għajjixkom.

Imlejtu bl-imrar lil Ġerusalemm,

lil dik li rabbietkom.

9Għax hi rat il-korla ta’ Alla nieżel fuqkom,

u qalet: “Isimgħu ġirien Sijon:

Alla bagħat niket kbir fuqi,

10għax ġarrabt jasar uliedi, subien u bniet,

il-jasar li fih bagħathom Alla ta’ dejjem.

11Jekk it-trobbija tagħhom ferrħitni,

it-tlugħ tagħhom bikkieni u qasamli qalbi.

12Ħadd m’għadu jifraħ bija,

armla li baqgħet weħidha;

kelli ħafna u telquni,

għax uliedi dinbu,

u daru lura mil-Liġi ta’ Alla.

13Il-kmandamenti tiegħu m’għarfuhomx,

lanqas ma mxew fi triqat il-preċetti ta’ Alla.

Lanqas ħadu l-mogħdijiet ta’ tagħlim il-ġustizzja tiegħu.

14Ħa jiġu ġirien Sijon!

Ftakru fl-eżilju ta’ wliedi,

subien u bniet,

li ġieb fuqhom Alla ta’ dejjem.

15Għax ġie fuqhom ġens mill-bogħod,

ġens kiefer, u b’ilsien barrani,

ġens bla qima għax-xjuħ,

ġens bla ħasra għat-trabi.

16Lill-armla ħadulha l-għeżież tagħha,

ħallewni waħdi, ċaħħduni minn bnieti.

17“Imma jien kif nista’ ngħinkom?

18Dak li ġieb fuqkom dan id-deni,

hu biss jista’ jeħliskom mill-għedewwa.

19Morru, uliedi, morru,

jien nibqa’ hawn mitluqa waħdi.

20Neħħejt minn fuqi lbies is-sliem,

u xeddejt l-ixkora tal-penitenza;

nibqa’ ngħajjat lil Alla ta’ dejjem, għomri kollu.

21Agħmlu l-qalb, uliedi,

sejħu lil Alla,

u hu jeħliskom mit-tirannija,

minn id l-għedewwa tagħkom.

22Jien stennejt is-salvazzjoni tagħkom

mingħand Alla ta’ dejjem,

u ġieni l-ferħ mingħand il-Qaddis.

Minħabba l-ħniena li dalwaqt tilħaqkom

mingħand Alla ta’ dejjem,

is-Salvatur tagħkom.

23Jien bgħattkom, imnikkta u mbikkija,

imma Alla jreġġagħkom għal għandi,

bil-hena u l-ferħ għal dejjem.

24Bħalma issa ġirien Sijon

raw l-eżilju,

hekk għad jaraw dalwaqt

is-salvazzjoni mingħand Alla tagħkom,

li se tiġikom b’sebħ kbir,

u bid-dija ta’ Alla ta’ dejjem.

25Uliedi, stabru bil-korla ta’ Alla,

li laħqitkom.

Ħaqarkom l-għadu,

imma dalwaqt taraw il-qerda tiegħu,

u minn fuq għonqu għad tgħaddi.

26Uliedi mħejma

kellhom jgħaddu minn toroq imħarbta;

ħaduhom bħal merħla maħtufa mill-għadu.

27Agħmlu l-qalb, uliedi, sejħu lil Alla;

dak li ġarrabkom għad jiftakar fikom.

28Bħalma fittixtu titbiegħdu minn Alla

hekk issa duru lejh u fittxuh

b’ħerqa għaxar darbiet aqwa.

29Għax dak li bagħat fuqkom dan l-hemm kollu,

hekk għad isalvakom,

u jimliekom b’ferħ dejjiemi.”

30Agħmel il-qalb Ġerusalemm,

min tak ismek għad ifarrġek.

31Imsejkna dawk li għamlulek id-deni,

u ferħu b’waqegħtek.

32Imsejkna l-ibliet li ijassru lil uliedek;

imsejkna l-belt li ħadet lil uliedek.

33Għax bħalma ferħet b’waqegħtek

u tgħaxxqet bil-qerda tiegħek,

hekk għad titnikket għall-ħerba tagħha.

34Jien inneħħilha l-ferħ tal-kotra tagħha,

u għaxqitha fi swied il-qalb nibdilha.

35Xita ta’ nar għad tinżel fuqha

mingħand Alla ta’ dejjem,

għal ħafna żmien,

u jgħammru fiha l-ispirti ħżiena

għal żmien twil.

36Ħares lejn il-Lvant, Ġerusalemm,

u ara l-ferħ li ġej għalik

mingħand Alla.

37Arahom ġejjin uliedek,

li darba int bgħatt ’il bogħod;

ġejjin flimkien miġbura

mil-Lvant u mill-Punent,

għall-kelma tal-Qaddis,

kollhom ferħana bil-glorja ta’ Alla.