ISAIJA 18 - Maltese Bible with DC

Kapitlu 18L-oraklu fuq l-Etjopja

1“Gwaj għall-art tal-insetti jżanżnu,

’l hemm mix-xmajjar ta’ Kus.

2Tibgħat messaġġiera bil-baħar,

f’dgħajjes tal-bordi fuq wiċċ l-ilma!

Morru, messaġġiera ħfief,

għand ġens ta’ nies misluta b’ġilda mielsa,

għand poplu jbażża’ fil-qrib u fil-bogħod,

ġens qawwi u rebbieħ,

artu jaqsmuha x-xmajjar.

3Intom ilkoll li tgħammru d-dinja,

intom li tgħixu fl-art,

malli jitla’ s-sinjal fuq l-għoljiet, ħarsu;

isimgħu malli ddoqq it-tromba.

4Għax dan qalli l-Mulej:

‘Jien inħares bi kwieti mill-għamara tiegħi,

bħas-sħana kalma tas-sirġa tax-xemx,

bħal sħaba nida fis-sħana tal-ħsad.’

5Għax qabel il-ħsad, meta jintemm l-inwar,

il-fjura ssir għanqud misjur,

imbagħad jinżabru l-friegħi bl-imqass,

u ż-żraġen jitqaċċtu u jintremew.

6Jitħallew gozz għat-tajr tal-priża;

u l-bhejjem tal-art.

Fuqhom jgħaddu s-sajf it-tajr tal-priża;

u l-bhejjem kollha tal-art jgħaddu x-xitwa.

7F’dak iż-żmien iġib offerta lill-Mulej tal-eżerċti

poplu ta’ nies misluta b’ġilda mielsa

- poplu jbażża’ fil-qrib u fil-bogħod,

ġens qawwi u rebbieħ, artu jaqsmuha x-xmajjar -

fil-post ta’ isem il-Mulej tal-eżerċti,

fuq l-għolja ta’ Sijon.”