ĠEREMIJA 14 - Maltese Bible with DC

Kapitlu 14In-nixfa

1Il-kelma tal-Mulej li ġiet lil

Ġeremija minħabba n-nixfa:

2“Ġuda bil-vistu,

u bwiebha bla ħajja.

Niesha lkoll mixħuta fl-art,

u għajta ta’ diqa tielgħa minn Ġerusalemm.

3Il-kbarat bagħtu l-qaddejja għall-ilma,

marru sal-ġwiebi, imma ilma ma sabux.

Jerġgħu lura bil-ġarar battala.

Imtlew bil-mistħija;

infixlu u għattew rashom.

4Ix-xogħol tar-raba’ waqaf,

għax xita ma kienx hemm fil-pajjiż.

Il-bdiewa mtlew bil-mistħija,

regħxu u għattew rashom.

5Għax imqar l-għażżiela wildet fir-raba’,

u telqet il-wild waħdu,

għax ħdura ma kienx hemm.

6Il-ħmir selvaġġi waqfu fuq il-blat,

jilhġu għan-nifs bħax-xakalli,

b’għajnejhom mejta,

għax ma kienx hemm ħaxix.

7Imqar jekk ħtijietna jixhdu kontrina,

Mulej, minħabba ismek qum,

għax ħafna huma ir-ribelljonijiet tagħna,

kontrik aħna dnibna.

8Tama ta’ Iżrael,

Salvatur tiegħu fi żmien il-bżonn!

Għala qisek barrani fl-art,

jew vjaġġatur wieqaf għal-lejl.

9Għala qisek bniedem mibluh,

bħal wieħed qalbieni ma jistax jgħin?

Imma inti f’nofsna Mulej,

u fuqna jissejjaħ ismek.

La titlaqniex!

10Dan jgħid il-Mulej dwar dan il-poplu:

‘Iħobbu jiġġerrew ’l hemm u ’l hawn,

f’riġlejhom ma għandhomx kwiet.

Għalhekk il-Mulej ma għoġbuhx.

Issa jiftakar fi ħżunithom,

u jħallashom ta’ dnubiethom.”

11U l-Mulej qalli: “Titlobx għall-ġid ta’ dan il-poplu.

13U jien għedtlu: “Ah! Sidi l-Mulej, ara l-profeti qegħdin jgħidulhom: ‘Ma tarawx ix-xabla, u ma jkollkomx il-ġuħ, għax sliem sħiħ nagħtikom f’dan il-pajjiż.”

14U l-Mulej qalli: “Il-gideb ħabbru f’ismi l-profeti, ma bgħatthomx, ma kkmandajthomx, ma kellimthomx. Viżjonijiet foloz, sħarijiet u tbatbit, u l-ħolm, ta’ moħħhom, dan ħabbrulkom.”

15Għalhekk dan jgħid il-Mulej: “Il-Profeti li qegħdin iħabbru f’ismi bla ma jien bgħatthom, u qegħdin jgħidu: ‘Xabla u ġuħ ma jkunu qatt f’dan il-pajjiż,’ dawn il-profeti bix-xabla u bil-ġuħ għad jintemmu.

17“U int għidilhom dan il-kliem:

‘Għajnejja jxerrdu d-dmugħ,

lejl u nhar bla heda,

għax ix-xebba, bint il-poplu tiegħi,

ħadet daqqa kbira u tfarrket,

ġerħa bla fejqan ġarrbet.

18Jekk noħroġ fir-raba’,

hemm insib il-mejtin bix-xabla.

Jekk nidħol fil-belt, insib il-mifnija bil-ġuħ,

għax imqar il-profeta u l-qassis

jiġġerrew mitlufin fil-pajjiż.’ ”

19Tlaqt int ’il Ġuda għalkollox?

Stmellejt int ’il Sijon?

Għaliex sawwattna bla ma hemm fejqan għalina?

Stennejna s-sliem u ma għandna ebda riżq;

żmien il-fejqan, u arana mwerwra.

20Aħna nafu, Mulej, bi dnubietna,

bil-ħażen ta’ missirijietna,

għax dnibna kontrik.

21Minħabba f’ismek tiċħadniex,

tkasbarx it-tron tal-glorja tiegħek,

ftakar! Tiksirx il-patt li għamilt magħna.

22Hemm xi ħadd fost l-allat fiergħa tal-ġnus,

li jista’ jibgħat ix-xita?

Jew jistgħu jagħtu weħidhom is-smewwiet

gliegel ta’ ilma?

Mhux inti l-Mulej, Alla tagħna?

Fik it-tama tagħna,

għax int għamilt dan kollu.”