GĦAMOS 8 - Maltese Bible with DC

Kapitlu 8Id-dehra tal-qoffa bil-frott

1Dan li wrieni Sidi l-Mulej:

qoffa bil-frott tas-sajf.

2U qalli: “X’inti tara, Għamos?”

U weġibt: “Qoffa bil-frott tas-sajf,”

u l-Mulej qalli:

“Wasal it-tmiem għall-poplu tiegħi Iżrael.

Ma naħfirlux iżjed.

3L-għana fit-tempju dakinhar

jitbiddel fi twerżiq,

oraklu tal-Mulej.

Ħafna jkunu l-katavri

mixħutin ma’ kullimkien.”Ir-regħba għall-flus

4Isimgħu dan,

intom li tikkalpestaw l-imsejken,

intom li ttemmu l-foqra tal-pajjiż,

5u tgħidu: “Meta se jgħaddi l-qamar ġdid,

ħa nbigħu l-qamħ.

Meta se jgħaddi s-Sibt ħa nferrgħu x-xgħir?

Inċekknu l-efa, u nkabbru x-xekel,

u nqarrqu b’miżien falz.

6Nixtru bil-flus il-foqra,

u b’żewġt iqrieq l-imsejken,

u nbigħu sal-karfa tal-qamħ.”

7Il-Mulej ħalef bil-foħrija ta’ Ġakobb:

“Ma ninsa qatt xejn minn għemilhom!”

8Ma titregħidx l-art minħabba dan?

U ma jibkix min jgħammar fiha?

Ma jkollhiex titla’ bħan-Nil,

u tinżel bħax-xmara tal-Eġittu?

9Jiġri f’dak il-jum,

oraklu ta’ Sidi l-Mulej,

li jiena nniżżel ix-xemx f’Nofsinhar,

u ndallam l-art binhar.

10Għad inbiddel il-festi tagħkom f’jiem ta’ vistu,

u l-għana kollu tagħkom fi krib;

illibbes il-ġenbejn bl-ixkejjer,

u nqarweż l-irjus kollha.

Dak il-Jum nagħmlu bħal jum ta’ vistu

għall-iben il-waħdieni,

u jibqa’ sal-aħħar bħal jum ta’ mrar.Il-ġuħ tal-kelma ta’ Alla

11“Ara, għad jiġi żmien,

oraklu ta’ Sidi l-Mulej,

meta nibgħat il-ġuħ fl-art;

mhux il-ġuħ tal-ħobż,

lanqas l-għatx għall-ilma,

iżda għas-smigħ tal-kelma tal-Mulej.

12Jibdew iduru minn baħar għal ieħor,

u jiġġerrew mit-Tramuntana għal-Lvant,

ifittxu l-kelma tal-Mulej,

u ma jsibuhiex.

13Dakinhar jinfnew bil-għatx

ix-xebbiet sbieħ u ż-żgħażagħ qalbiena.

14Dawk li jaħilfu bl-Għajb ta’ Samarija,

u jgħidu “Daqs kemm hu ħaj alla tiegħek, Dan’,

u ‘Daqs kemm hu ħaj il-maħbub tiegħek, Birsaba’.

Jaqgħu u qatt iżjed ma jqumu.”