BIN SIRAK 5 - Maltese Bible with DC

Kapitlu 5L-għana u l-preżunzjoni

1Isserraħx fuq il-ġid li għandek,

u tgħidx, ‘Dan biżżejjed għalija.’

2Tħallix il-ġibdiet u saħħtek imexxuk huma,

biex timxi wara dak li tixtieq qalbek.

3U tgħidx: “Min jista’ għalija,”

għax il-Mulej żgur jitħallas minnek.

4Tgħidx: “Dnibt! B’daqshekk xi ġrali!”

għax il-Mulej idum biex jagħdab.

5La sserraħx rasek mill-maħfra,

hekk li żżid dnub fuq ieħor.

6U tgħidx, “Il-ħniena tiegħu kbira;

jaħfirli l-kotra ta’ dnubieti”;

għax kemm il-ħniena u kemm l-għadab huma tiegħu,

imma fuq il-midinbin iniżżel l-għadab.

7Toqgħodx tistenna biex iddur lejn il-Mulej,

u tħallix minn jum għal ieħor,

għax ħin bla waqt jasal għadab il-Mulej,

u meta jiġi biex jitħallas minnek, tintilef għalkollox.

8Isserraħx fuq ġid li qlajt bil-qerq,

għax xejn ma jkun jiswielek fi żmien l-għawġ.Is-sinċerità u r-rażan

9Idderrix fl-irjieħ kollha,

u timxix f’kull mogħdija:

jagħmel hekk il-midneb li issa jgħid ħaġa u issa oħra.

10Kun sod fil-fehma tiegħek

u għid dejjem l-istess kliem.

11Kun ħafif biex tisma’,

imma aħsibha qabel twieġeb.

12Jekk tifhem f’xi ħaġa, wieġeb lill-ġar tiegħek,

imma jekk le, qiegħed idek fuq fommok.

13Ġieħ u għajb iġib il-kliem,

u lsien il-bniedem hu t-telfien tiegħu.

14Tħallix min isejjaħlek giddieb,

u tistad lil ħadd b’ilsienek,

15għax, jekk il-ħalliel hu bla ġieħ,

min jitkellem issa mod u issa ieħor jikkundannawh.

16La titqarraqx la fi ħwejjeġ kbar,

u lanqas fi ħwejjeġ żgħar,

u flok ta’ ħabib iġġibx ruħek ta’ għadu,