ĠUDITTA 16 - Maltese Bible with DC

Kapitlu 16

1“Għannu bit-tnabar lil Alla;

għannu biċ-ċimbali lill-Mulej;

insġulu salmi u innijiet;

faħħruh u sejħu ismu.

2“Il-Mulej hu Alla li jeqred il-gwerer; waqqaf il-kamp f’nofs il-poplu tiegħu, ħelisni minn idejn dawk li kienu jiġru warajja.

3“Niżel l-Assir mill-għoljiet

tat-Tramuntana;

Niżel bl-eluf tal-eżerċti tiegħu;

il-kotra tiegħu mliet il-widien,

u ż-żwiemel ksew l-għoljiet.

4“Qal li jrid jaħraq l-art tiegħi,

jinfed iż-żgħażagħ bis-sejf,

isabbat it-trabi mal-art,

jitlaq it-tfal għall-priża,

u xbejbiet tiegħi għaż-żebliħ.

5Iżda l-Mulej li jista’ kollox,

bi driegħ mara ġiebhom fix-xejn.

6Mhux bis-saħħa taż-żgħażagħ

waqa’ l-qalbieni tagħhom;

ma għelbuhx il-ġganti l-kbar,

ma ħakmuhx ulied il-ġorfijiet;

imma b’seħer ġmiel wiċċha qerditu

Ġuditta bint Merari.

7“Neħħiet minn fuqha lbies ir-romol,

biex terfa’ l-magħkusa ta’ Iżrael.

Dilket wiċċha bil-fwieħa qawwija;

8dawret xagħrha b’faxxa ma’ rasha;

libset l-għażel biex tqarraq bih.

9“Is-sandli tagħha seraqlu għajnejh;

il-ġmiel tagħha jassarlu qalbu;

ix-xabla ħanxritlu għonqu.

10“Il-Persjani triegħdu bis-sogru tagħha,

u bi qlubitha tkexkxu l-Medi.

11“Għajtu l-magħkusin u l-għadu beża’;

għajtu d-dgħajfin, u l-għadu twerwer;

għollew leħinhom, u l-għadu ħarab!

12“Ulied l-ilsiera bniet nifduhom;

u ferewhom qishom ilsiera maħrubin;

intemmu fix-xejn quddiem l-eżerċtu tal-Mulej.

13Għanja ġdida jien ngħanni lil Alla tiegħi;

Mulej, int kbir u glorjuż;

tal-għaġeb il-qawwa tiegħek

ma jegħlbek ħadd!

14“Ħa jaqduk il-ħlejjaq kollha,

għax int għedt kelma, u kollox sar.

Int bgħatt l-ispirtu tiegħek u ħalaqhom;

m’hemm xejn li jieqaf lill-kelma tiegħek.

15“Il-muntanji u l-ibħra jitheżżu mis-sisien;

u l-blat quddiemek jinħall bħax-xama’;

iżda għal dawk li jibżgħu minnek;

m’għandekx ħlief ħniena.

16“Ftit jiswa s-sagrifiċċju jfuħ quddiemek;

u ftit li xejn hu x-xaħam tal-vittmi maħruqa;

imma kbir hu għal dejjem min jibża’ mill-Mulej.

17“Ħażin għall-ġnus li jqumu għall-poplu tiegħek.

Iħallashom il-Mulej setgħani f’jum il-ħaqq.

Nar u dud jibgħat f’laħamhom,

u bl-uġigħ għal dejjem jibqgħu jibku.”

Radd il-ħajr

18Meta mbagħad waslu Ġerusalemm, marru jaduraw lil Alla; u malli l-poplu tnaddaf, offrew is-sagrifiċċji, l-offerti u d-doni tagħhom., u għal ħafna żmien wara mewtha, ma kien hemm ħadd li seta’ jbażża’ lill-poplu ta’ Iżrael.